لێدوانی نوێی حکومەتی هەریم لەبارەی پڕۆژەی ڕووناکی

وتەبێژی حکومەتی هەرێم ڕایگەیاند ئەوانەی دژی ڕوناکین، هەڵمەتێکی میدیایی مەبەستداریان دژی پرۆژی کارەبای 24 کاتژمیریی دەستپێکردووە.

ئەمشەو پێشەوا هەورامانی، وتەبێژی حکومەتی هەرێمی کوردستان ڕایگەیاند، لە چەند کەناڵێک وا بڵاوکراوەتەوە گوایە حکومەتی هەرێمی کوردستان بۆ دابەشکردنی غازی ماڵان گرێبەستی لەگەڵ کۆمپانیایەک کردووە کە بەرپرسبێت لە دابەشکردنی غازی ماڵان، ئەم بابەتە هیچ ڕاستییەکی نییە و هیچ گرێبەست و ڕێککەوتنێک لەگەڵ کەس لەئارادا نییە و شێوازی بەدەستگەیشتنی غاز بەهەمان سیستەمی ئێستا دەبێت کە بەنرخی پاڵپشتیکراوە لەلایەن حکومەتەوە.

سەبارەت بە پرۆژەی کارەبای 24 کاتژمێریی کە گرانیی نرخەکەی بووەتە هۆی دروستبوونی ناڕەزایی هاوڵاتییان لە تۆڕە کۆمەڵیاتەییەکاندا، پێشەوا هەورامانی دەڵێت: “ئەوانەی (دژی روناکین) هەڵمەتێکی میدیایی مەبەستدارییان دەستپێکردووە! دژی پڕۆژەی ڕوناکی و دەیانەوێت لەگرنگی پڕۆژەکە بدەن، ئێمە لەحکومەتی هەرێمی کوردستان دوپاتی دەکەینەوە بە ڕەچاوکردنی دۆخی هاوڵاتییانمان و بەرژەوەندی ئەوان حکومەتی هەرێمی کوردستان پلانی خۆی لەهەموو کوردستان جێبەجێدەکات و بۆیەکەمین جار دوای چەندین ساڵ حوکمڕانی خەڵکی هەرێمی کوردستان دەبنە خاوەنی کارەبای ۲٤ کاتژمێری”.

وتیشی: “ئێستاش ژمارەی هاوبەشانمان لەپڕۆژەی ڕوناکی بۆتە ۸٦ هەزار خێزان و هەموو خێزانەکانیش لەداهاتوو سودمەند دەبن”.

وتەبێژی حکومەتی هەرێم ڕاشیگەیاند، “داواکارین میدیاکاران بە ئەمانەت و بە مەسئولییەتەوەو پیشەییانە زانیاری بگەیەننە وەرگرانییان و کارێک نەکەن پیشەیبون و ڕاستگۆییان نیشانەی پرسیاری لەسەر دروستببێت کە بەداخەوە لەسەر بەشێکیان دروستبووەو بەپێچەوانەوە لەمەودوا داوای یاساییان لەسەر تۆماردەکرێت، لەئەگەری بڵاوکردنەوەی هەواڵی ناڕاست”.