سەندیکای رۆژنامەنووسان: بەشدار بازیانی بە تۆمەتی ناوزڕاندن دەستگیرکراوە

لە هەینی رابردووەوە رۆژنامەنووس بەشدار بازیانی لەلایەن هێزەكانی ئاسایشى سلێمانی لەگەڵ سێ هاوکاری دیکەی دەستگیرکراوە. دواتر هاوکارەکانی ئازاد کران. سەندیکای رۆژنامەنووسانی سلێمانی دەڵێت، بازیانی بەپێی مادەی 433 دەستگیرکراوە.
 
رەحمان غەریب، رێكخەری سەنتەری میترۆ بە ٧ڕۆژی وت، "بەشدار بازیانی و سێ كەس لە هاوكارانی لە میدیا21، لەلایەن هێزەكانی ئاسایشى سلێمانی دەستگیركران، دەستبەسەر زۆربەی كۆمپیوتەر و مۆبایلەكانیاندا گیرا."
 
رێكخەری سەنتەری میترۆ دەڵێت، "پاش لێكۆڵینەوە سێ رۆژنامەوانەکەی دیکە کە بە ناوی (دانا ساڵح، نەبەز شێخانی و سەردەشت حەمە ساڵح)ـن ئازادكران، بەڵام جارێكی دیکە دانا ساڵح، بانگكرایەوە بۆ ئاسایش و ئێستا دەستبەسەرەو لێكۆڵینەوەی لەگەڵ دەكرێت."
 
لەبارەی هۆکاری دەستگیرکردنیان رەحمان غەریب وتی، "لە رۆژی دەستگیركردنیانەوە سەنتەری میترۆ لە سۆراخی ئەم كەیسە بووە و لە پەرەسەندنەكانی ئاگادارە، هەندێ وردەكاریی هەن نامانەوێ لای ئێمەوە بڵاوبكرێنەوە، چونکە لە چوارچێوەی دەسەڵاتی لایەنی لێكۆڵەر و دادگەیە و بەهۆی لیستی تۆمەتەکان چاوەڕوانی بڕیاری دادەوەرین."
 
رۆژنامەنووس بەشدار بازیانی لە ماوەی مانگێکدا ئەوە دووەمجارە دەستگیر دەکرێت، بۆ یەکەمجار رۆژی 5ی شوباتی 2025 دەستگیرکرا.

هەر سەبارەت بەو دۆسیە کاروان ئەنوەر، سەرۆکی لقی سەندیکای رۆژنامەنووسانی سلێمانی لە راگەیێندراوێکدا بڵاویکردەوە، نیوەڕۆی ئەمڕۆ سەردانی بەشی لێكۆڵینەوەی ئاسایشی گشتی سلێمانی كرد و داوای بینینی رۆژنامەنووس بەشدار بازیانی كرد.
 
بە وتەی کاروان ئەنوەر، رۆژنامەوانەکە "لە دۆخێكی تەندروستیی جێگیردا بوو، بە شێوەیەكی گشتی گلەیی و گازندەی لە شوێن و پێداویستیی رۆژانەی نەبوو."
 
سەبارەت بە تۆمەتەکەشی، سەرۆکی لقی سەندیکای رۆژنامەنووسانی سلێمانی وتی: "بەشدار بازیانی بە مادەی 433 لە یاسای سزادانی عێراقی دەستگیركراوە، تائێستا لێكۆڵینەوە لەسەر وردەكاریی بابەتەكە و راگرتنی لەلایەن دادوەرەوە بەردەوامە."
 
ھەر کەسێک ببێتە ھۆی ناوزڕاندنی کەسێک سزادەدرێت بە حەپسکردن یان پێبژاردن بەپێی مادە 433 لە یاسای سزادانی عێراقی ژمارە 111 ی ساڵی 1969، سزاکە بە پێی تاوانەکە دەگۆرێت.
 
کاروان ئەنوەر  دەڵێت،:"لقی سلێمانی سەندیكای رۆژنامەنووسانی كوردستان پارێزەران و نوێنەرانی یاسایی لقەكەمان رادەسپێرین لەنزیكەوە لە چوارچێوەی یاسا و رێسا بەركارەكاندا ئاگاداری ئەو بەشەی كەیسەكە بن, كە پەیوەستە بە میدیاوە."
 
لەبارەی ئەو بەشەی کەیسەکە كە پەیوەستە بە پێدانی "هەواڵ و زانیاریی ناڕاست و چەواشەکاری" کاروان ئەنوەر دەڵێت، "ھیوادارین دادوەری رەچاوی پیشە میدیاییەکەی بەشدار بازیانی بکات و لەزووترین کاتدا رێكارە یاساییەکانی ئازادكردنی بە كەفالەت بۆ بگرێتە بەر تا رۆژی دادگەی."
 
بەپێی ئاماری سەنتەری میترۆ، ساڵی رابردوو 182 پێشێلکاری بەرامبەر 176 رۆژنامەوان و دامەزراوەی میدیایی لە هەرێمی کوردستان تۆمارکراون.