هەڵوێستی ڕوسیا لەبارەی ڕوداوه‌كانی سوریاوە

وەزارەتی دەرەوەی ڕوسیا ڕایگەیاند، نیگەرانن لە تێکچونی دۆخی ئەمنی سوریا و داوای لە هەمو سەرکردەکانی ئەو وڵاتە کرد هەوڵبدەن بە زوترین کات ئەو خوێنڕشتنە ڕابگرن. وتەبێژی كۆشكی سەرۆكایەتی ڕوسیاش دەڵێت، "

ماریا زاخارۆڤ، وتەبێژی وەزارەتی دەرەوەی ڕوسیا ئەمڕۆ هەینی لە لێدوانێکدا کە ئاژانسی فەرمی تاس-ی ڕوسی بڵاویکردوەتەوە، دەڵێت، "لەم هەلومەرجە سەختەدا، ڕوسیا داوا لە هەمو ئەو سەرکردانەی سوریا دەکات کە کاریگەرییان هەیە، هەمو هەوڵێک بدەن بۆ ئەوەی بە زوترین کات کۆتایی بە خوێنڕشتنەکە بهێنن و دوربکەونەوە لە مەدەنییەکان".

ئاماژەی بەوەشکرد، لەو هەلومەرجە سەختانەی قۆناغی ڕاگوزەر کە سوریا پێیدا تێدەپەڕێت، پاراستنی ڕێککەوتنی نیشتمانی و بەرزکردنەوەی ئاسایشی هاوڵاتیان و دەستەبەرکردنی مافە یاساییەکانیان بەبێ گوێدانە نەتەوەیی یان ئایینییەکان لە هەمو شتێک گرنگترە.

وتەبێژی وەزارەتی دەرەوەی ڕوسیا، هیوای خواست کە هەمو ئەو وڵاتانەی کە کاریگەرییان لەسەر دۆخی سوریا هەیە بەشداری بکەن لە چارەسەرکردنی كێشەكانی ئەو وڵاتە، هەروەها ئامادەیی مۆسکۆی دەربڕی بۆ هەماهەنگییەکی نزیک لەگەڵ هاوبەشە نێودەوڵەتییەکان بە مەبەستی کەمکردنەوەی پەرەسەندنەکان.

لەلایەكی دیكەوە دیمیتری پێسکۆڤ، وتەبێژی كۆشكی سەرۆكایەتی ڕوسیا (کرێملن) رایگەیاند، ڕوداوەکانی شاری لازقییەی کەنار دەریاکانی سوریا کە بنکەی سەربازی ڕوسیای تێدایە، كاریگەری لەسەر ئاسایشی کارمەندانی سەربازیی ڕوسیا نەبوە.

دەشڵێت، "ئاسایشی پێویست بۆ سەربازەکانمان دابین دەکرێت و نامەوێت لێدوانی زیاتر لەسەر ئەو بابەتە بدەم، چونکە وردەکارییەکانی نازانین".