كاره‌بای سلێمانی: پرۆژه‌ی ڕوناكی له‌سه‌رجه‌م گه‌ڕه‌كه‌كان جێبه‌جێده‌كه‌ین
2025-03-07
45 جار خوێنراوەتەوە
به‌ڕێوه‌به‌رایه‌تی گشتی كاره‌بای سلێمانی رایگه‌یاند، پرۆژه‌ی روناكی چوه بواری جێبه‌جێكردنه‌وه و نزیكه‌ی نۆ هه‌زار هاوبه‌ش كاره‌بای 24 كاتژمێرییان بۆ دابینكرا و ئه‌م پرۆژه‌یه‌ش له‌سه‌رجه‌م گه‌ڕه‌كه‌كانی دیكه جێبه‌جێده‌كرێت.
كاره‌بای سلێمانی بڵاویكرده‌وه، شه‌وی رابردوو به‌ئاماده‌بونی ئه‌ندازیار ئه‌نوه‌ر حه‌مه سه‌عید به‌ڕێوه‌به‌ری گشتی كاره‌بای سلێمانی، ئه‌ندازیار هیوا عه‌بدوڵا جێگری به‌ڕێوه‌به‌ری گشتی، ئه‌ندازیار غالب محه‌مه‌د به‌ڕێوه‌به‌ری كۆنتڕۆڵی كاره‌بای سلێمانی و به‌ڕێوه‌به‌ری گواستنه‌وه‌ی كاره‌بای سلێمانی و به‌ڕێوه‌به‌ری دابه‌شكردنی كاره‌بای سلێمانی/رۆژهه‌ڵات و به‌ڕێوه‌به‌ری ته‌كنیك و لێپرسراوی مۆلیده ئه‌هلییه‌كان و ستافی پرۆژه‌ی روناكی له ئه‌نجومه‌نی وه‌زیران، له هه‌ردو وێستگه‌ی ناوه‌ندی شار و مه‌ڵكه‌ندی یه‌كه‌می قۆناغی پرۆژه‌ی روناكی كاره‌بای 24 كاتژمێری چوه بواری جێبه‌جێكردنه‌وه.
ئاماژه‌ی به‌وه‌شكردوه، له‌م قۆناغه‌دا نزیكه‌ی نۆ هه‌زار هاوبه‌شی ماڵان و بازرگانی له‌سه‌ر هه‌شت فیده‌ر كاره‌بای به‌رده‌وامیان بۆ دابینكرا، كه ده‌كه‌ونه گه‌ڕه‌كه‌كانی (سه‌ركارێز، توی مه‌لیك سابونكه‌ران ، مه‌ڵكه‌ندی ، ئیبراهیم پاشا ، دارۆغا، حاجی حان، شه‌قامی ئۆرزدی و ئه‌سحابه‌سی و شه‌قامی كاوه).
كاره‌بای سلێمانی باسی له‌وه‌شكردوه، "پرۆژه‌ی رووناكی له سلێمانی به‌رده‌وام ده‌بێت و له ئاینده‌یه‌كی نزیكدا قۆناغه‌كانی دیكه‌ی له گه‌ڕه‌كه‌كانی دیكه ده‌چێته بواری جێبه‌جێكردنه‌وه".
شه‌وی رابردو وه‌زاره‌تی كاره‌بای حكومه‌تی هه‌رێم، گه‌یاندنی "پرۆژه‌ی روناكی" بۆ سلێمانی راه‌یاند و بۆئه‌و مه‌به‌سته‌ش زیاتر له نۆ هه‌زار هاوبه‌ش له‌و پرۆژه‌یه سودمه‌ند ده‌بن و كاره‌بای 24 كاتژمێریان پێده‌درێت، له‌كاتێكدا ناڕه‌زایه‌تیه‌كان به‌رامبه‌ر به نرخی ئه‌و پرۆژه‌یه رو له‌زیادبونه.
|