خۆسەریی رۆژئاڤا: ئەو شەڕەی ڕوودەدات دیمەشق لێی بەرپرسە

بەڕێوەبەرایەتیی خۆسەر لە راگەیێندراوێکدا رووداوەکانی نێوخۆی سووریا دەخاتە ئەستۆی دیمەشق و داوای وەستانی شەڕ دەکات. هاوکات رایدەگەیێنێت، "دیالۆگی راستەقینەی نیشتمانیی پێویستە".
 
بەڕێوەبەرایەتی خۆسەری دیموکراتی لە باکوورو رۆژهەڵاتی سووریا، لە راگەیێندراوەکەیدا کە ئەمڕۆ هەینی بڵاویکردووەتەوە رایدەگەیێنێت، "ئێمە لەکاتێکدا مەترسی و خەمگینی خۆمان لە رووداوەکان رادەگەیێنین، دەستنیشانی دەکەین، کە ئەو ئاڵۆزییانەی روودەدەن لە ئەنجامی خوێندەنەوەی هەڵەیە لەلایەن دەسەڵاتدارانی دیمەشقەوە بۆ دۆخی سووریا، چونکە هەستیاریی دۆخی سووریا لەبەرچاو نەگیراوە، بەتایبەت کێشەی پێکهاتە و مەزهەبەکان".
 
راگەیێندراوەکەی خۆسەری لە باکووری رۆژهەڵاتی سووریا دوای ئەوە دێت، لە دوێنێوە دەیان رووبەڕووبوونەوەی چەکداری لەنێوان هێزەکانی وەزارەتی بەرگریی سووریا و چەند گرووپێکی چەکدار روویانداوە، کە دەگوترێت سەر بە رژێمی پێشووی بەشار ئەسەدن.
 
بەڕێوەبەرایەتی خۆسەر دەڵێت: "ئەو شەڕەی روودەدات وڵاتەکەمان بەرەو کارەسات دەبات و دەبێتە هۆکاری کۆمەڵکوژیی گەلەکەمان لە سووریا دا".
 
بەڕێوەبەرایەتیی خۆسەر داوا لە هەموو لایەنەکان دەکات، بە "هۆشیاری و خۆڕاگرییەوە" لە رووداوەکان نزیک ببنەوە. راشیگەیاند: "ئەم ئاڵۆزییانە دەبنە هۆکاری زیاتر لە یەک دوورکەوتنەوەی هێزە نیشتمانییەکانی سووریا و تەنیا گەلی سووریاش باجی ئەو ناکۆکییانە دەدات".
 
لە راگەیێندراوەکەدا بەڕێوەبەرایەتیی خۆسەر ئاماژە بە هەڵوێستی پێشتری خۆیان دەکات و دەڵێت: "ئێمە چەندین جار گوتوومانە، بۆ ئەوەی سووریا بگەیێندرێتە کەناری ئارامی و چارەسەری ناکۆکی کێشەی نێوان هێزەکانی سووریا، پێویستیی بە دیالۆگی نیشتمانیی راستەقینە هەیە. جەخت دەکەینەوە، کە ئەوە رێگەیەکە بۆ چارەسەری بنیاتنانەوەی سووریایەکە، کە هیوا و خواستی گەلی سووریا بە هەموو پێکهاتەکانییەوە پێکدەهێنێت".
 
بەڕێوەبەرایەتیی خۆسەر داوای وەستاندنی شەڕ و چارەسەری کێشەکان بە گفتوگۆ دەکات و دەشڵێت: "داواش لە گەلەکەمان لە سووریا دەکەین، شوێنی ئەو کەسانە نەکەون دەیانەوێت شەڕێکی نێوخۆیی لە وڵاتی ئێمەدا دروستبکەن، لەو شەڕەدا هەمووان ون دەبن و دووژمنانمان ئەوە بۆ بەرژەوەندیی خۆیان دەقۆزنەوە".
 
بەگوێرەی سەرچاوە خۆجێییەکانی سووریا لە ئەنجامی شەڕەکە تاوەکو بەیانیی ئەمڕۆ هەینی، زیاتر لە 70 کەس کوژراون و دەیانی دیکەش بریندارن. لەدوای رووخانی رژێمی ئەسەد ئەمە خوێناویترین رووبەڕووبوونەوەیە لە سووریا.