نه‌ته‌نیاهۆ: كه‌رتی غه‌ززه‌ پارچە پارچە ده‌كه‌ین

سەرۆکوەزیرانی ئیسرائیل رایگەیاند، سوپا غەززە دابەش دەکات و "دەست بەسەر خاکدا دەگرێت،" بۆئەوەی حەماس ناچار بکات بارمتەکان ئازاد بکات.

نەتەنیاهوو سەرۆکوەزیرانی ئیسرائیل  وتی، سوپا "کەرتی غەززە پارچەپارچە دەکات و هەنگاو بە هەنگاو گوشارەکان زیاتر دەکات، بۆ ئەوەی حەماس بارمتەکانمان بگەڕێنێتەوە،" هەروەها گوتیشی ئیسرائیل "دەست بەسەر خاکدا دەگرێت، گورز لە تیرۆریستان دەدات و ژێرخانەکان خاپوور دەکات."
 
ئاماژەی بەوەشدا  سوپا "کۆنتڕۆڵی میحوەری مۆراگ دەکات". مۆراگ دەکەوێتە نێوان هەردوو شاری رەفەح و خان یونس لە باشووری غەززە.
 
نەتەنیاهوو ئەو میحوەرەی بە رێڕەوی فیلادێلفی بەراورد کرد، کە بە درێژایی سنووری میسر درێژ دەبێتەوە. ئیسرائیل دەڵێت، بۆ رێگری لە بە قاچاخبردنی چەک بۆ ناو خاکی فەلەستین لە میسرەوە، پێویستە کۆنتڕۆڵی بکات.
 
نەتەنیاهوو ئاماژەی بەوەشکرد ئیسرائیل بەردەوام دەبێت لەسەر زیادکردنی گوشاری سەربازی تاوەکو حەماس بارمتەکان ئازاد دەکات.
 
لە کۆی 251 بارمتەی دەستبەسەرکراو لە کاتی هێرشەکەی حەماس لە 7ی تشرینی یەکەمی 2023، تائێستا 58 بارمتە لە غەززە دەستبەسەرن، لەنێویاندا 34 کەس کە سوپای ئیسرائیل دەڵێت کوژراون.
 
گرووپێک کە نوێنەرایەتی نزیکەی 50 بارمتەی ئازادکراوی پێشوو دەکەن و خزم و کەسوکاری ئەوانەی کە هێشتا دەستبەسەرن، رۆژی چوارشەممە راگەیێندراوێکیان بڵاوکردەوە و تێیدا داوایان کرد، "بۆ مسۆگەرکردنی رێککەوتنێکی گشتگیری ئازادکردنی بارمتەکان، بەزووترین کات بۆ گفتوگۆکان بگەڕێنەوە."
 
ئیسرائیل لە 18ی ئادارەوە دەستی بە  هێرشی ئاسمانی بۆ سەر خاکی فەلەستین کردەوە، ئەوەش دوای ئەوەی گفتوگۆکان سەبارەت بە هەنگاوەکانی داهاتوو لە ئاگربەستێکی شەش هەفتەییدا شکستیان هێنا.
 
بەپێی ئامارەکانی تەندروستیی غەززە، لە 18ی ئادارەوە لانیکەم 1066 کەس لە غەززە کوژراون.
 
بەگوێرەی ئامارەکانی تەندروستیی ئەو کەرتەی فەلەستین کە نەتەوە یەکگرتووەکان بە باوەڕپێکراوی دەزانێت، بە گشتی لە سەرەتای جەنگەوە 50 هەزار و 423 کەس کوژراون.