عێراق ڕێككه‌وتنێكی 10 ساڵی له‌گه‌ڵ توركیا ئاشكرا ده‌كات
21 کاتژمێر پێش ئێستا
216 جار خوێنراوەتەوە
وه‌زاره‌تی سه‌رچاوه‌كانی ئاوی عێراق دەڵێت، ڕێككه‌وتنی چوارچێوه‌ی نێوان عێراق و توركیا بۆ ماوه‌ی 10 ساڵ مافی ئاوی عێراقی مسۆگه‌ر كردوه و راشیگه‌یاند، "هه‌ڵمه‌تی لابردنی ده‌ستدرێژییه‌كان بۆسه‌ر روبار و ده‌ریاچه‌كان 80 مه‌تر سێجا له چركه‌یه‌كدا ئاو پاشه‌كه‌وت ده‌كات.
خالد شه‌ماڵ وته‌بێژی وه‌زاره‌تی سه‌رچاوه‌كانی ئاوی عێراق رایگه‌یاندوه، "دۆخی ئاو له عێراق سه‌قامگیره، ئه‌مه‌ش به‌هۆی ڕێكاره‌كانی وه‌زاره‌ته‌وه كه به‌شداربون له به‌هێزكردنی توانای به‌ڕێوه‌بردنی ئاو، هه‌روه‌ها هه‌ڵمه‌تی نیشتمانی گشتگیر بۆ لابردنی پێشێلكارییه‌كان جێبه‌جێكراوه، به‌وه‌ش نزیكه‌ی 80 مه‌تر سێجا ئاوی له چركه‌یه‌كدا دابینكردوه".
ئاماژه‌ی به‌وه‌شكرد، "هه‌ڵمه‌تێك هه‌یه بۆ لابردنی ده‌ستدرێژیكردنه سه‌ر ڕوباره‌كان و كه‌ناراوه‌كان و حه‌وزه‌كانی ماسی بێ مۆڵه‌ت، جگه له‌وه‌ش چه‌ندین ڕێوشوێنیان جێبه‌جێكردوه بۆ به‌رزكردنه‌وه‌ی ڕۆیشتنی ئاو له ڕوباری فورات، له‌وانه ناردنی ڕاسته‌وخۆی ئاو له ڕوباری دیجله‌وه له ڕێگه‌ی به‌نداوی سامه‌راوه، هه‌روه‌ها دابینكردنی ئاو له ده‌ریاچه‌ی سه‌رسار".
سه‌باره‌ت به هه‌وڵه ده‌ره‌كییه‌كانی وه‌زاره‌تی سه‌رچاوه‌كانی ئاو، خالید شه‌ماڵ ڕونیكرده‌وه، "له چوارچێوه‌ی لیژنه‌یه‌ك كه پێكهاتوه له نوێنه‌رانی وه‌زاره‌ت و داموده‌زگا په‌یوه‌ندیداره جیاوازه‌كان، رێكه‌وتنێك له‌گه‌ڵ توركیا واژۆكراوه كه به‌پێی ئه‌و رێكه‌وتنه مافی ئاو بۆ عێراق بۆ ماوه‌ی 10 ساڵی داهاتو زامن كراوه".
جه‌ختیشیكرده‌وه كه "رێككه‌وتنه‌كه سێ میحوه‌ری سه‌ره‌كی له‌خۆده‌گرێت، له‌وانه به‌ڕێوه‌بردنی هاوبه‌شی حه‌وزی دیجله-فورات، ئاڵوگۆڕی زانیاری و داتابه‌یس بۆ به‌ڕێوه‌بردنی پڕۆژه‌كانی ئاودێری، وه‌به‌رهێنان له‌لایه‌ن كۆمپانیا توركییه‌كانه‌وه به هه‌ماهه‌نگی له‌گه‌ڵ ده‌سه‌ڵاتدارانی عێراق، هه‌روه‌ها دانوستان له‌گه‌ڵ لایه‌نی توركیا به‌پێی ڕێككه‌وتنی چوارچێوه به‌رده‌وامه".
|