لە رۆژانی جەژندا نزیکەی 200 هەزار گەشتیار هاتوونەتە کوردستان
22 کاتژمێر پێش ئێستا
127 جار خوێنراوەتەوە
گەشتیارانی عێراق بۆ پشووی جەژن روویان لە هەرێمی کوردستان کردووە و سەدان ئۆتۆمبێل لە بازگەکان ریزیان بەستووە. گەشتیاران دەڵێن، ئەم ساڵ لە بازگەکان کارئاسانی زیاتریان بۆ کراوە.
گەشتیاران، لەبارەی یارمەتی بازگەکان باس لەوە دەکەن، یارمەتییەکانیان زۆر باشن و رێز لە خەڵک دەگرن، ئەوانەی ئێرە زۆر بەباشی کارەکانیان بەڕێدەکەن، بەڵام ئێمەی گەشتیار هیچ رێکخستێنمان نیە، هەموومان بەهەڕەمەکی مل لێدەنێین بۆیە ئاوا قەرەباڵغی دروست دەبێت."
حکومەتی هەرێمی کوردستان تەواوی بازگەکانی ئاگادارکردووەتەوە کە کارئاسانی بۆ گەشتیاران بکەن و چاوەڕوانی هاتنی گەشتیارێکی زۆر دەکرێت بۆ پارێزگاکانی هەرێمی کوردستان، هەر گەشتیارێک بە کەمتر لە دوو خولەک دەتوانێت دڵنیایی ئاسایش وەربگرێت کەپێی دەگوترێت کارتی نشینگە و بۆ ماوەی سێ مانگ دەتوانێت هاتووچۆی پێبکات.
گرووپێکی گەشتیاری بۆ ئەم جەژنە زیاتر لە 600 گەشتیاری لەڕێگەی 15 پاسەوە هێناوەتە هەرێمی کوردستان.
ناسر عەبود، سەرپەرشتیاری گرووپە گەشتیارییەکەیە و دەڵێت، "ئەم ساڵ کارئاسانی بازگەکان باشتربووە لە ساڵانی رابردوو، بەڵام وەک دەزانن قەرەباڵغی زۆر، هەندێک ئاستەنگی دروستدەکات ئەمەش ئاساییە."
بەگوێرەی ئاماری بازگەکانی هەولێر، سلێمانی و دهۆک تەنیا لەماوەی سێ رۆژی رابردوودا نزیکەی 200 هەزار گەشتیاری عێراقی سەردانی هەرێمی کوردستانیان کردووە.
|