'شاندێکی هەرێمی کوردستان بۆ مووچەی مانگی دوو دەچێتە بەغدا

سەرچاوەیەک لە ئەنجوومەنی وەزیرانی عێراق دەڵێت، لە پێنجشەممەوە رێکارەکانی لیستی مووچە تەواوکراون ئەمڕۆ راپۆرتی مووچە بۆ تەیف سامی دەنێردرێت. سەرچاوەیەکش لە وەزارەتی دارایی هەرێمی کوردستان دەڵێت: "ئەمڕۆ شاندێکی حکومەتی هەرێمی کوردستان دەچێتە بەغدا."
 
سەرچاوەیەک لە وەزارەتی داریی هەرێمی کوردستان بە میدیای پارتی راگەیاندووە: "هیچ کێشەیەک بۆ لیستی مووچە دروست نەبووە، بەڵکو ئەمانە تێبینیی رۆتینی و ئاسایین و چارەسەرکراون، هەموو رێکارەکانیش تەواو بوون."
 
ئاماژەی بەوەشکردووە: "ئەمڕۆ شاندێکی حکومەتی هەرێمی کوردستان دەچێتە بەغدا بۆ ئەوەی وەڵامی پرسیارەکانی تەیف سامی بداتەوە و مووچەی مانگی شوبات بنێردرێت."
 
بەپێی زانیارییەکان، شاندەکە پێکهاتوون لە رێباز عەباس، راوێژکار و بەڕێوەبەری نووسینگەی وەزیری دارایی، کۆڤان تەحسین، بەڕێوەبەری گشتیی ژمێریاری لە وەزارەتی دارایی، هونەر جەمال، وتەبێژی وەزارەتی دارایی، مریەم عوسمان، بەڕێوەبەری گشتیی خانەنشینی و ستافی سیستمی پەیڕۆڵ لە فەرمانگەی تەکنەلۆژیا و زانیاری.

11 رۆژە لەلایەن شاندێکی وەزارەتی دارایی هەرێمی کوردستانەوە، لیستی مووچەی مانگی شوبات بۆ بەغدا بردراوە، بەڵام تاوەکو ئێستا تەیف سامی، وەزیری دارایی عێراق رەزامەندی لەسەر ناردنی مووچەی ئەو مانگە نەداوە.