وەزارەتی دارایی هەرێم: داوای دوو مووچەمان بۆ بانکەکان نەکردووە
10 کاتژمێر پێش ئێستا
88 جار خوێنراوەتەوە
وەزارەتی دارایی هەرێمی کوردستان دەڵێت، لەنێو لیستی مووچەی مانگی نیسان داوای دوو مووچەیان بۆ بانکەکان نەکردووە و ئەو دەنگۆیانەی بڵاوکراونەتەوە راست نین.
وەزارەتەکە لە روونکردنەوەیەکدا دەڵێت، "هاوشێوەی مانگەکانی پێشوو تەنها داوای یەک مووچە بۆ فەرمانبەرانی بانکەکان کراوە و هیچ گۆڕانکارییەک لە لیستی مووچەکانیان نەکراوە".
دەقی روونکردنەوەکە:
روونکردنەوەیەک لە بەڕێوبەرایەتیی گشتی بانکە بازرگانییەکان / وەزارەتی دارایی و ئابووری.
لە چەند پەیج و میدیایەک هەواڵێک بڵاوکراوەتەوە کە ئاماژەیان بەوەکردووە وەزارەتی دارایی عێراق چەند تێبینییەکی لەسەر لیستی مووچەی مانگی نیسانی فەرمانبەرانی هەرێمی کوردستان هەبووە، یەکێک لە تێبینییەکان لەسەر مووچەی بانکە حکومییەکان بووە بۆ مانگی نیسان کە گوایە داوای دوو مووچە بۆ بانکەکان کراوە و لەناو لیستەکاندا ناوی دوو بانک لەبیر کراوە و دواتر چارەسەر کراوە.
بە پێویستمان زانی بۆ هەموو لایەکی روونبکەینەوە ئەو هەواڵە هیچ بنەمایەکی نییە و بۆ مانگی نیسان هاوشێوەی مانگەکانی پێشوو تەنها داوای یەک مووچە بۆ فەرمانبەرانی بانکەکان کراوە و هیچ گۆڕانکارییەک لە لیستی مووچەکانیان نەکراوە.
تێبینی؛ هەرچەندە داواکردنی دوو مووچە بەپێی یاسا بۆ فەرمانبەری بانکەکان بۆ مانگەکانی نیسان و ئاب و کانونی یەکەم ئاساییە و ساڵانە هەر فەرمانبەرێکی بانک لە عێراق و هەرێمی کوردستان پانزە مووچە وەردەگرن کە سێ مووچەیان زێدەکییە.
|