فوئاد حوسێن : لەبارەی مووچەوە گەشبینم، بەڵام عێراقیش کێشەی دارایی هەیە

وەزیری دەرەوەی عێراق رایگەیاند، لە سەردانەکەیدا بۆ واشنتن باسی پرسی هاوردەکردنی گازیان کردووە. لەبارەی هەناردەکردنەوەی نەوتی هەرێمی کوردستانیش وتی، "لەگەڵ ئەو دوو کۆمپانیا قسەم کردووە کە نەوتەکە هەناردە دەکەن، لەبارەی مووچەوە وتی گەشبینم، بەڵام عێراقیش کێشەی دارایی هەیە
 
فوئاد حوسێن، وەزیری دەرەوەی عێراق لە واشنتنی پایتەختی ئەمریکا قسەی بۆ رۆژنامەوانان کرد و رایگەیاند، "لەگەڵ سکرتێری وەزیری دەرەوەی ئەمریکا، راوێژکاری ئاسایشی نیشتمانیی ئەمریکا، وەزارەتی گەنجینە، بەرپرسان لەنێو ئیدارە و دەرەوەی ئیدارەی ئەمریکا کۆبوومەتەوە."
 
لەبارەی نێوەڕۆکی کۆبوونەوەکانی ئاماژەی بەوە کرد، "کۆبوونەوەکان پەیوەست بوون بە چەند بابەتێکی جیاواز، ئەوەی لە وەزارەتی گەنجینە باسکرا جیاواز بوو لە وەزارەتی دەرەوە، ئەوەی لە کۆشکی سپی باس کرا جیاواز بووە لە جێی دیکە. باسی پەیوەندییە دووقۆڵییەکان لەڕووی ئابووری، ئاسایش، سیاسی و هتد.. کرا، باسی دۆخی ناوچەکە، داهاتووی ناوچەکە و سووریا و دانوستاندنەکانی نێوان ئێران و ئەمریکا کرا."
 
'سەردانەکە پەیوەندیی بە دانوستاندنی نێوان تاران و واشنتنەوە نییە'
 
وەزیری دەرەوەی عێراق ئەوەی خستەڕوو، "سەردانەکەی ئێمە پەیوەندیی بە دانوستاندنی نێوان تاران و واشنتنەوە نییە، چونکە دانوستاندنەکانی نێوانیان بەردەوامە. لەبارەی دۆخی ئێستا گفتوگۆمان کردووە، باسی کۆبوونەوەی داهاتووشمان کردووە لەنێوان هەردوولا عێراق و ئەمریکا دەکرێت و ناومان ناوە گفتوگۆی ستراتیژی، هیوادارم لە دوو مانگی داهاتوودا بکرێت. تاوەکو ئێستا چوار کۆبوونەوە کراوە."
 
'هەموو هەوڵەکان دەخەینەگەڕ بۆ هەناردەکردنەوەی نەوت'
 
لەبارەی پرسی نەوتەوە فوئاد حوسێن وتی، "بابەتی هەناردەکردنەوەی نەوت بە بۆریی هەرێمی کوردستان بۆ تورکیا، ئەمە بەشێک بوو لە گفتوگۆکان، دەرفەتم بۆ رەخسا قسە لەگەڵ هەردوو کۆمپانیای پەیوەندیدار بکەم، کە لە هەرێمی کوردستان کار دەکەن."
 
"من ئاگام لە بۆچوونی حکومەتی هەرێمی کوردستانە و قسەم لەگەڵ برام مەسرور بارزانی، سەرۆکوەزیرانی هەرێمی کوردستان کردووە. رای حکومەتی عێراقیش دەزانم، چونکە بەشێک بووم لە دانوستاندن و گفتوگۆکان، کە گەڕاینەوە هەموو هەوڵەکانی خۆمان دەخەینەگەڕ بۆ نزیککردنەوەی بیر و بۆچوونەکان لەنێوان هەرسێ لایەن، چارەسەرکردنی کێشەکان و دەستکردن بە هەناردەکردنەوەی نەوتی هەرێمی کوردستان. هەوڵ دەدەین، نەک بڵێم نەوت هەناردە دەکەینەوە."
 
'ئەمریکا داوا دەکات بۆ گاز پشت بە خۆمان ببەستین'
 
وەزیری دەرەوەی عێراق وتی، "ئێمە باسی سەربەخۆییمان کردووە لە بواری وزە، لەم بابەتەدا کێشەمان هەیە، بەڵام لە هەمان کاتیشدا پرسی گازمان شیکردەوە، تاوەکو ئێستاش گاز لە ئێرانەوە هاوردە دەکەین بۆ بەرهەمهێنانی کارەبا و دەتوانین بڵێین 30% بۆ 33%ی بەرهەمهێنانی کارەبا پشت بە گازی ئێران دەبەستێت. لایەنی ئەمریکی داوا لە حکومەتی عێراقی دەکات ئاراستەکە بەرەو پشتبەخۆبەستن بێت."
 
فوئاد حوسێن ڕاشیگەیاند، "ماوەیەکی باشە دەستمان بە وەبەرهێنان لە گازی هاوەڵ کردووە و گەیشتووینەتە قۆناخێکی پێشکەوتوو، دەتوانم بڵێم سوود وەرگیراوە لێی بۆ بەرهەمهێنانی وزەی کارەبا، بەڵام ئەمە بەس نییە، دەستمان کردووە بە گرێبەستکردن لەگەڵ چەندین کۆمپانیا بۆ بەرهەمهێنانی گازی شل، بەڵام بەهۆی کارکردن لە کێڵگەکان، رەنگە سێ بۆ چوار ساڵ بخایێنێت و ئەوکات عێراق دەتوانێت سەربەخۆ بێت لەم بوارەدا و هەنگاو بە هەنگاو دەبێت."
 
'هاوردەکردنی کارەبا لە تورکیا دەگەیێنینە 600 مێگاوات'
 
وەزیری دەرەوەی عێراق زیاتر وتی، "دەستمان بە گفتوگۆ کردووە بۆ هاوردەکردنی گاز لە وڵاتانی دیکە، لەگەڵ تورکیا گفتوگۆی چڕمان کردووە، ئێستا نزیکەی 300 مێگاوات کارەبا لەو وڵاتەوە هاوردە دەکەین و رێککەوتووین بۆ زیادکردنی بۆ 600 مێگاوات و دواتریش 800 مێگاوات."
 
دەشڵێت، "رێککەوتنێکی کۆنیش هەیە کە عێراق لەگەڵ ئەنجوومەنی هاریکاریی کەنداو هەیەتی و هەوڵدەدەین 400 مێگاوات کارەبا لە وڵاتانی کەنداو هاوردە بکەین، ئێستاش 100 مێگاوات لە ئوردن هاوردە دەکەین و ئەمانەشمان بۆ ئەمریکا روونکردەوە، بەڵام پێویستمان بە کاتە بۆئەوەی بە تەواوی سەربەخۆ بین."
 
وتیشی، "باسی هاوردەکردنی گازمان کردووە لە تورکمانستانەوە، گفتوگۆشمان لەگەڵ زۆر وڵات کردووە کە گاز بەرهەم دەهێنن. هەموو ئەمانەمان بە ئەمریکا گوتووە، بۆئەوەی روون بێت ئێمە بەردەوام کار دەکەین لەپێناو سەربەخۆیی لە بواری وزەدا."
 
'لەبارەی مووچە گەشبینم، بەڵام عێراقیش کێشەی دارایی هەیە'
 
لەوەڵامی پرسیاری، "بۆچی دەبێت هەموو جارێک پێداچوونەوە بە لیستی مووچەدا بکرێت و کێشەکە چارەسەر نەکراوە؟ کەی چارەسەر دەکرێت؟" لە وەڵامدا فوئاد حوسێن وتی، "مووچەی پار درا، نابێت بڵێین نەدراوە. کێشە هەیە، دەبێت بزانین چۆن چارەسەریان دەکەین، کێشە لە مەسەلەی ناوەکان و هەندێک هەڵوێست هەبوون، بە بڕوای من دەشمێنن. ئەگەر کێشەیەک روویدا، هەوڵی چارەسەر دەدەین، گەشبینم، بەڵام عێراقیش کێشەی دارایی هەیە و نرخی نەوت دابەزیوە."
 
'قسە کراوە بۆئەوەی عێراق لە ئاگری جەنگ دووربخرێتەوە'
 
وەزیری دەرەوەی عێراق باسی دۆخی ئەمنیشی کرد و ئاماژەی بەوە کرد، "چەندین بواری هاوبەش هەن لەنێوان ئەمریکا و عێراق، ئێستا عێراق سەقامگیر و ئارامە، هەستیش بەوە کراوە، بەڵام ئەمە وابەستەیە بە ناوچە هەرێمییەکانەوە، تەنیا بە نێوخۆی عێراقەوە پەیوەست نییە، بۆیە قسە کراوە، بۆئەوەی عێراق لە ئاگری جەنگ دووربخرێتەوە."
 
'رێککەوتنی ئەمریکا و ئێران لەسەر حسابی لایەنی سێیەم نابێت'
 
لەبارەی پەیوەندیی سەردانەکەی بە دانوستاندنی نێوان تاران و واشنتنشیەوە گوتی، "دانوستاندنی ئێران و ئەمریکا لە رێگەی حکومەتی عومانەوەیە، ئێمە دەزانین و پەیوەندیی چڕمان هەیە لەگەڵ عومان، چونکە حکومەتی عومان ئەزموونی هەیە لەم بوارەدا، ئەزموونی لە کۆکردنەوەی لایەنەکان و گەڕان بەدوای چارەسەردا هەیە. پشتگیری لەم هەوڵەی عومان دەکەم، کە ئێرەمان جێهێشت دەچینە مەسقەت و لەوێ برایانمان دەبینین. رێککەوتنی ئەمریکا و ئێران لەسەر حسابی لایەنی سێیەم نابێت و دەبێتە هۆی ئارامبوونەوەی ناوچەکە. ئێمە پشتیوانیی دانوستاندن دەکەین، هیوادارین رێککەوتن بکرێت و ناوچەکە ئارام ببێتەوە، ئەمەش کاریگەریی لەسەر عێراقیش دەبێت."