کۆبوونەوەی ئێران و ئەمریکا کۆتایی هات، شەممەی داهاتوو دەست پێدەکاتەوە

وەزارەتی دەرەوەی ئێران دەڵێت، قۆناغی یەکەمی گفتوگۆی ناڕاستەوخۆی ئێران و ئەمریکا بۆ هەڵگیرانی گەمارۆ و پرسی ئەتۆمی کۆتایی هات.
 
شاندی ئەمریکا و ئێران لە مەسقەتی پایتەختی عومان کۆبوونەوە.  بەگوێرەی وەزارەتی دەرەوەی ئێران دەڵێت، کۆبوونەوەکە دوو کاژێر و نیوی خایاندووە. 
 
عەباس عێراقچی، وەزیری دەرەوەی ئێران لەبارەی گفتوگۆکەیان  بە میدیای وڵاتەکەی رایگەیاند، "نە ئێمە نە لایەنەکەی دیکە گفتوگۆیێکی بێبەرهەمی ناوێت. گفتوگۆ دوای گفتوگۆ بکەین و کات بەفیرۆ بدەین، یان بۆ هەمیشە درێژە بکێشن."
 
عەباس عێراقچی لەبارەی بەردەوامبوون و کاتی گفتوگۆی داهاتوویان ئاماژەی بەوەدا، "شەممەی داهاتوو گفتوگۆی دووەم دەکرێت."
 
وەزارەتی دەرەوەی ئێران ئاشکراشی کرد کە عەباس عێراقچی و ستیڤ ویتکۆف، "چەند خولەکێک بە راستەوخۆیی قسەیان کردووە." 
 
شاندی ئەمریکا تاوەکو ئێستا هیچ لێدوانێکیان لەسەر کۆبوونەوەکە و شێوازی بەڕێوەچوونی نەداوە.
 
دوای کۆبوونەوەکە بەدر عەبدولسەعید، وەزیری دەرەوەی عومان لە تۆڕی کۆمەڵایەتیی ئێکس رایگەیاند، "کۆبوونەوەکە لە کەشێکی هاوڕێیانە بەڕێوەچوو."
 
بەدر عەبدولسەعید دڵخۆشیی خۆی بە میوانداریکردن و نێوەندگیریکردنی کۆبوونەوەی نێوان واشنتن و تاران دەربڕی "بۆ گفتوگۆکردن لەسەر ئامانجی هاوبەش بۆ رێککەوتنێکی پابەندکەر و دادپەروەرانە."
 
لە لایەنی ئێرانی، عەباس عێراقچی، وەزیری دەرەوەی وڵاتەکە سەرۆکایەتیی شاندی تارانی دەکرد و لایەنی ئەمریکیش، ستیڤ ویتکۆف، نێردەی تایبەتی سەرۆکی ئەمریکا بۆ کاروباری رۆژهەڵاتی نێوەڕاست سەرۆکایەتیی شاندی واشنتنی دەکرد.