پڕۆژە یاسایەك 50 رۆژە کۆبوونەوەکانی پەرلەمانی ڕاگرتووە
2025-03-24
302 جار خوێنراوەتەوە
ئەمڕۆ ئه‌نجومه‌نی نوێنه‌رانی عیراق دانیشتنی ئاسایی خۆی ئه‌نجام دەدات و تیایدا حه‌وت بڕگه تاووتوێ ده‌كات، كه گرنگترینیان پڕۆژه‌یاسای ده‌سته‌ی حه‌شدی شه‌عبی-یه.
د. بڕیار رەشید ئەندامی ئەنجومەنی نوێنەرانی عیراق لەفراكسیۆنی یەكێتی رایگەیاند: "بڕیار وایە ئەمڕۆ دووشەممە 24ی 3ی 2025 كۆبوونەوەی ئەنجوومەنی نوێنەرانی عیراق بەڕێوەبچێت و تێیدا پڕۆژەیاسای دەستەی حەشدی شەعبی كەلە 18 ماددە پێكهاتووە، خوێندنەوەی یەكەمی بۆ بكرێت".
"سەبارەت بە پڕۆژەیاساكە، كێشە لەنێوان فراكسیۆنە عەرەبییەكاندا هەیەو هەر ئەوەشە نزیكەی 50 رۆژە دانیشتنەكانی ئەنجومەنەكەی راگرتووە، بەڵام ئێمە وەك فراكسیۆنە كوردستانییەكان بەشێك نین لەو كێشەیە" د.بڕیار رەشید وای وت.
پڕۆژەیاسای دەستەی حەشدی شەعبی، كێشەی لەنێوان سەركردەكانی چوارچێوەی هەماهەنگی دروست كردووە، هەندێكیان لەگەڵ ئەوەدان بەزوویی تێبپەڕێندرێت، هەندێكی دیكەشیان تێبینیان لەسەری هەیە، چونكە بەگوێرەی پڕۆژەكە، 4 هەزار ئەفسەرو فەرماندەی حەشدی شەعبی خانەنشین دەبن.
|