لێدوانی نوێی لاهوور شێخ جەنگی لەبارەی پێکهێنانی حکومەت

لاهور شێخ جەنگی سەرۆکی بەرەی گەل رایگەیاند دەبێت حکومەتێکی کارا و بەهێز و خزمەتگوزار پێکبهێنرێت کە رەنگدانەوەی خواست و داواکارییەکانی خەڵک بێت، نەک لەسەر بنەمای دابەشبوونی دوو زۆنی و دوو حزبی پێکبهێنرێت.

دەقی راگەیەندراوی لاهور شێخ جەنگی:

لەگەڵ ئەندرو بیزلی كونسوڵى گشتيی بریتانیا له‌ هه‌رێمى كوردستان گفتوگۆمانکرد دەربارەی دۆخی گشتی هەرێمی کوردستان و عێراق و پرسی گۆڕانكاریه‌كانی ناوچەکە و مەسەلەی پێکهێنانی کابینەی دەیەمی حکومەتی هەرێم و کێشەکانی نێوان هەرێم و بەغدا بەتایبەت کێشەی مووچەی مووچەخۆرانی هەرێم.

جەختمانکردەوە لەسەر پێویستی گۆڕانکاریی لە عێراق و هەرێمی کوردستان لەسەر ئەو بنەمایەی کە پایەکانی حکومڕانی بەهێز بکرێت و دەستی دەرەکی دوربخرێتەوە کە بۆتە رێگر لە بەردەم پێشکەوتن و گەشەکردنی وڵات.

رامانگەیاند کە دەبێت چیتر ململانێ سیاسیەکان تێکەڵ بە مووچەی مووچەخۆرانی هەرێم نەکرێت، هەرێم و بەغداش بیر لە چارەسەری ریشەیی کێشەکان بکەنەوە کە ساڵانێکی زۆرە هاووڵاتیان باجەکەی دەدەن.

دەربارەی پێکهێنانی کابینەی دەیەمی حکومەتی هەرێم جەختمانکردەوە کە دەبێت حکومەتێکی کارا و بەهێز و خزمەتگوزار پێکبهێنرێت کە رەنگدانەوەی خواست و داواکارییەکانی خەڵک بێت، نەک لەسەر بنەمای دابەشبوونی دوو زۆنی و دوو حزبی پێکبهێنرێت