بەردی بناغەی پردی تەنگی سەید محەمەد لە هەڵەبجە دانرا

بەردی بناغەی پردی تەنگی سەیید محەممەد لە هەڵەبجە دانرا کە پارێزگاکە بە ئیدارەی سەربەخۆی گەرمیانەوە دەبەستێتەوە. وەزیری ئاوەدانکردنەوە و نیشتەجێکردن دەڵێت، گوژمەکەی زیاتر لە 26 ملیار دینارە و پێویستە بە کەمتر لە 900 رۆژ تەواو بکرێت.
 
ئەمڕۆ شەممە بە ئامادەبوونی قوباد تاڵەبانی، جێگری سەرۆکوەزیرانی هەرێمی کوردستان و دانا عەبدولکەریم، وەزیری ئاوەدانکردنەوە و نیشتەجێکردن، بەردی بناغەی پردی تەنگی سەیید محەممەد لە پارێزگای هەڵەبجە دانرا.
 
دوای دانانی بەردی بناغەکە، دانا عەبدولکەریم رایگەیاند، درێژیی پردەکە 690 مەترە و زیاتر لە 26 ملیار دیناری بۆ تەرخانکراوە.
 
بەوتەی وەزیری ئاوەدانکردنەوە و نیشتەجێکردنی هەرێمی کوردستان، دەبێ کۆمپانیای جێبەجێکار لە ماوەی کەمتر لە 900 رۆژدا پڕۆژەکە تەواو بکات و بخرێتە خزمەت خەڵکەوە.
 
دانا عەبدولکەریم ئاماژەی بەوەشکرد: ''ئەم پڕۆژەیە تەواوکەری پڕۆژەکانی دیکەیە کە وەک وەزارەت لە رابردوودا لە سنووری پارێزگای هەڵەبجە جێبەجێمان کردوون''.
 
وەزیری ئاوەدانکردنەوە و نیشتەجێکردنی هەرێمی کوردستان باسی لەوەشکرد، هەر لە سەرەتای کابینەی نۆیەمەوە گرنگیان بە قیرتاوکردنی رێگەکان داوە و ''لەو چوارچێوەیەدا رێگەوبانی زیاتر لە 13 گوندی سنووری پارێزگای هەڵەبجە بە گوژمەی زیاتر لە دوو ملیار دینار قیرتاو و تێکەڵەیان بۆ کراوە.''
 
وەک دانا عەبدولکەریم دەڵێت، بەگشتی لەو ماوەیەدا بەگوژمەی زیاتر لە 560 ملیۆن دینار رێگەوبانی هەڵەبجە نۆژەن و چاککراوەتەوە.
 
22ـی شوباتی 2024 مەسرور بارزانی لە سەردانێکدا بۆ پارێزگای هەڵەبجە، بەردی بناغەی پردی تووەقوتی دانا. وەزیری ئاوەدانکردنەوە و نیشتەجێکردن وتی: ''کارکردن لەم پڕۆژە ستراتیژییەدا دەستیپێکردووە، بەڵام لەبەر ئەوەی پڕۆژەکە پێویستی بە دیزاینکردنەوە بوو، ئاستی جێبەجێکردنەکەی کەمێک دواکەوت.''
 
بەوتەی دانا عەبدولکەریم، ئێستا دیزاینکردنەوەی پڕۆژەکە تەواو بووە و ''لە داهاتوویەکی نزیکدا گۆڕانکارییەکەی لە وەزارەت پەسەند دەکرێت و بە شێوەیەکی زۆر خێرا دەچێتە واری جێبەجێکردنەوە.''
 
پردی تووەقوت، پارێزگای هەڵەبجە و ئیدارەی سەربەخۆی گەرمیان پێکەوە دەبەستێتەوە، گۆژمەی تەرخانکراو بۆ پڕۆژەکە زیاتر لە 30 ملیار دینارە و 720 رۆژ بۆ تەواوکردنی دیاریکرابوو.
 
نۆژەنکردنەوەی رێگەی نێوان دەروازەی سنووریی سازان و ناوەندی پارێزگاکە یەکێک لەو بابەتانە بوو کە وەزیری ئاوەدانکردنەوە و نیشتەجێکردن ئاماژەی پێکرد و گوتی: ''لە داهاتوویەکی نزیکدا لە ئەنجوومەنی وەزیران رەزامەندی لەسەر نۆژەنکردنەوەی رێگەکە دەدرێت و دەچێتە واری جێبەجێکردنەوە''.
 
درێژیی رێگەکە زیاتر لە 22 کیلۆمەترە و بەگشتی دەروازەی سنووریی سازان، پارێزگای کرماشانی رۆژهەڵاتی کوردستان و هەڵەبجە پێکەوە دەبەستێتەوە. وەک دانا عەبدولکەریم دەڵێت، تێچووی نۆژەنکردنەوەی رێگەکە زیاتر لە 60 ملیار دینارە.