لاهور شێخ جەنگی: میلیشیا بە میلیشیا وەڵام دەدەینەوە

لاهور شێخ جەنگی ڕایدەگەیەنێت، "بافڵ تاڵەبانی، هیچ مافێكی نییە هەڵبكووتێتە سەر ماڵەكەم و بە هێزی چەكدار دەوروبەری ماڵەكەم بتەنێت و لە ئەگەری هێرشكردنە سەرم، بەرگری لە خۆمان دەكەین و میلیشیا بە میلیشیا وەڵام دەدەینەوە".
 
لاهور شێخ جەنگی، سەرۆكی جووڵانەوەی بەرەی گەل، لە كاتێكدا لەنێو ماڵەكەی لە لالەزار بە هێزێكی زۆری ئەمنی تەوق كراوە، بە تەلەفۆن قسەی بۆ ئاڤا كرد و وەڵامی پرسیارەكانی هەوراز گوڵپی دایەوە.

لاهور شێخ جەنگی دووپاتی كردەوە، "جێگەی قبووڵ نییە هێزی چەكداریی حیزبی لەشوێنی دادگا و دامەزراوەی ئەمنی هەڵبكووتنە سەر شوێنی مانەوەی من و ئەمە بەهیچ جۆرێك قبووڵكراو نییە".

"بەبێ ئەوەی ئاگادار بكرێمەوە كە فەرمانی دەستگیركردنم هەیە و بەبێ هەبوونی فەرمانی دادوەر بە دەستگیركردنم، هێزێكی چەكدار دەوروبەری شوێنی مانەوەی منیان گرتووە و دووپاتیكردەوە لە ئەگەری هەر جۆرە هێرشێك، وەڵام دەدەینەوە و بەرگری لە خۆمان دەكەین".

بەشێك لە قسەكانی لاهور شێخ جەنگی بۆ ئاڤا میدیا:

- لەلایەن دەزگای دادوەری و ئەمنییەوە ئاگادار نەكراومەتەوە كە فەرمانی دەستگیركردنم هەیە.

- تەعەدا لە هیچ كەس قبووڵ ناكەین.

- حكومەت و دەزگای ئەمنی لە سلێمانی نەماوە و تاكە كەسێك بە تەنها حوكم دەكات.

- بڵاوەپێكردنی هێز لە دەوروبەری ماڵەكەم تەعەددایە.

- ئەندامانی هێزە ئەمنییەكان خۆیان بە تاوانی كوشتن تۆمەتبارن.

- قبووڵ ناكرێت حیزب لە شوێنی حكومەت هێز بجووڵێنێت.

- داوا لە خەڵكی سلێمانی دەكەین دان بەخۆیان بگرن.

- بەردەوام هەڕەشە لەسەر ژیانم هەبووە و لەبەر خاتری خەڵكی بەشەرەفی سلێمانی ماومەتەوە.

- بافڵ بۆی نییە لە جیاتی دادگا و پۆلیس ڕادەستی یاسام بكات.

- هەمیشە حەزمان كردووە یاسا سەروەر بێت.

- ئەوەی دەكرێت چەتەگەری و مافیاگەرییە.

- لەڕێگەی میدیاكانەوە زانیم فەرمانی دەستگیركردن بۆ من دەركراوە.