سودانی پەیامێک ئاراستەی مەسعود بارزانی دەکات

محەمەد شیاع سودانی، سەرۆك وەزیرانی عێراق بەبۆنەی 42هەمین ساڵیادی ئەنفالی بارزانییەكان ڕایگەیاند، پرسە و هاودەنگی خۆمان ئاراستەی برایانی بارزانی دەکەین بە تایبەتی بەڕێز مەسعود بارزانی، بۆ ئەو قوربانیدانە و ئەو خوێنە پاکە کە لەگەڵ خوێنی هەمو عێراقییەکان، بوە هۆی ڕزگاربون".

محەمەد شیاع سودانی، ئەمڕۆ هەینی لە پەیامێكدا كە لە پلاتفۆڕمی "X" بە زمانی كوردی بڵاویكردوەتەوە و ڕایگەیاند، 42  ساڵ به‌سه‌ر شاڵاوە دڕندەکانی ئەنفالدا تێدەپڕێت، کە پیر و منداڵ و ژنان و گەنجانی بنەماڵەی بارزانی"ـیە بەڕێزەکانی کردە ئامانج.

ئاماژەی بەوەشكرد، ئەو هەڵمەتانە بوە هۆی بێسەر و شوێنکردنی هه‌شت هه‌زار کەس بە شێوەیەکی دڕندانە و نامرۆڤانە، بەڵگەیەکی ڕونە لەسەر دیکتاتۆرییەت و تاوانکاریی ڕژێمی لەناوچو.

سودانی باسی لەوەشكردوە، بەم بۆنەیەوە پرسە و هاودەنگی خۆمان ئاراستەی برایانی بارزانی دەکەین بە تایبەتی بەڕێز مەسعود بارزانی، بۆ ئەو قوربانیدانە و ئەو خوێنە پاکە کە لەگەڵ خوێنی هەمو عێراقییەکان، بوە هۆی ڕزگاربون لەو سەردەمە لە تاریکییەوە بۆ ئازادی و دادپەروەری لە سایەی سیستەمی دیموکراسیماندا.

شاڵاوی ئەنفالی بارزانییەکان لە 31ی تەممووزی ساڵی 1983 دەستیپێکرد و تاوەکو ئابی هەمان ساڵ لە لایەن رژێمی بەعسەوە بەردەوام بوو. 
 
لەو شاڵاوەدا، هەشت هەزار پیاو و گەنجی بارزانی دەستگیرکران و بۆ بیابانەکانی باشووری عێراق راگوێزران و لەوێ زیندەبەچاڵ کران.