د. مۆنا یاقۆ: دەسته نەکرێتە لایەنێک لە ململانێ سیاسییەكاندا
22 کاتژمێر پێش ئێستا
256 جار خوێنراوەتەوە
د. مۆنا یاقۆ، سەرۆکی دەستەى مافی مرۆڤی هەرێمی كوردستان لەبارەی دو ڕاگەیەندراوی دەسەتەكەیەوە لەبارەی ڕوداوەكەی لالەزار ڕایگەیاند، ئەو ئەکادیمستێکى سەربەخۆیە و سەر بە هیچ حزبێك نەبوە و لە بەرامبەر هیچ ڕوداوێکدا بێ دەنگ نەبون. دەشڵێت، "هیوادارین کێبڕکێ لەسەر بنەمای هاوکاری و خزمەتکردنی هاوڵاتیان و چارەسەرکردنی کێشە هەڵپەسێردراوەکان بێت، نەک ئەوەی دەسته بکرێتە لایەنێک لە هەر ململانێیەکی سیاسیدا".
د. مۆنا یاقۆ، ئەمشەو لەبارەى دەرکردنى دو ڕاگەیەندراوی جیاواز بە ناوى دەستەوە، سەبارەت بە ڕوداوەکانى لالەزار ڕونیكردەوە كە، ئەو ئەکادیمستێکى سەربەخۆیە، لە هیچ قۆناغێکى ژیانیدا سەر بە هیچ حزبێك نەبوە، هەر لە سەرەتاوە ئامانجی لە کارکردن لە دەستەى مافى مرۆڤ، پراکتیزەکردنی پسپۆڕییەکەی و خزمەتکردنى هاوڵاتیان بو، دور لە حیساباتى سیاسى.
ئاماژەی بەوەشكرد، لە ماوەى چوار ساڵ زیاتر لە کارکردنی لە دەستە، بە پەرۆش بون بۆ جێگیرکردنی پرەنسیپی یەکڕیزی، و کارکردن بە شێوەیەکى تەواو بێ لایەنانە، بۆ بەدیهێنانی هاوسەنگی لە بەدوداچونى کێشەکان لە شارە جیاجیاکانی هەرێمدا.
بەگوێرەی ڕاگەیەندراوەكە، کارەکانیان لە سەر بنەماى بانگەشەى میدیایى یا شوێنکەوتنى خواستەکان نەبوە، بەڵکو لە سەر بنەماى چاودێرىکردنى مەیدانى جددى بوە، زۆر جار دیدار و سەردانەکانیان دور لە چاوى کامیراکان بوە، چونکە ئامانجى سەرەکییان هەمیشە دەستنیشانکردنى پێشێلکاریەکان و دۆزینەوەى چارەسەر بوە، نەك تۆمارکردنى هەڵوێستى کەسى و قارەمانێتى. لەسەر بنەمای قەناعەتێکی پتەو، پێوەرە سەرەکییەکەمان ڕازیکردنی ویژدان بوە نەك هیچ لایەن و کیان و تاکێك.
ئەوەشیخستەڕو، لە بەرامبەر هیچ ڕوداوێکدا بێ دەنگ نەبون، بەڵکو دەستیانکردوە بە پەیوەندى لە گەل لایەنە پەیوەندیدارەکان و ڕاپۆرت و نوسراو و تێبینیەکانیان بابەتیانە و شەفافانە بۆ ناردون. بۆیە نابێت جددیەتی کارەکانیان تەنها بەو شتانە بپێورێت کە لە پلاتفۆرمی سۆشیال میدیادا بڵاودەکرێنەوە.
د. مۆنا یاقۆ باسی لەوەشكردو، کاتێك ڕوداوەکانى لالەزار ڕویدا، ئەو لە مۆڵەتى فەرمى بوە، و هاوکارەکانی ڕاسپاردوە بۆ ئەوەى لە نزیکەوە چاودێرى بابەتەکە بکەن. ڕاستەوخۆ لەگەڵ گەڕانەوەی، دەستپێشخەری داواکارییەکی فەرمی کردوە بۆ سەردانی گیراوانی سلێمانی، بە پلەی خۆی وەک سەرۆکی دەسته و کەسایەتییەکی سەربەخۆ.
دەشڵێت، "لەبەر ئەوەی ئۆرگانە نێودەوڵەتییەکان داوای ڕونکردنەوەیان لەسەر ئەو بابەتە کردبو. هەروەها ئەمەش لە وەڵامی داواکارییەکانی بنەماڵەی دەستگیرکراوەکاندا بو، بێ ئەوەى پەیوەندى بە لایەنى حزبیەوە هەبێت. هەروەها هەماهەنگیەك ئەنجامدرا لەگەڵ هاوکارانێك کە پاشخانی سیاسی تایبەتیان هەیە بۆ ئاسانکردنى ڕێکخستن و ڕێکارەکان".
د. مۆنا یاقۆ ڕونیشیكردەوە، ڕێز و حورمەتیان بۆ هەمو هاوکاران و هەمو لایەنە حزبییەکان دوپاتدەکەنەوە. ئەوەی ڕویدا لە زوترین دەرفەتدا پێکەوە باسی دەکەن، وەک داب و نەریتی دەسته، هەروەها پابەندبونیان بۆ بەهێزکردنی کردەوەی هاوبەش دوپاتدەکەنەوە، هیوادارن کێبڕکێ لەسەر بنەمای هاوکاری لەگەڵ دەستەکەیان و خزمەتکردنی هاوڵاتیان و چارەسەرکردنی کێشە هەڵپەسێردراوەکان بێت، نەک ئەوەی دەسته بکرێتە لایەنێک لە هەر ململانێیەکی سیاسیدا.
دەشڵێت، "ئەو متمانەیەی لە ساڵانی ڕابردودا لە هەمو سکاڵاکاران بەدەستمان هێناوە، چ لە ناوخۆ و چ لە دەرەوەی عێراق، نوێنەرایەتی سەروەت و سامانێکی بەنرخ دەکات کە لە هیچ بارودۆخێکدا بەفیڕۆ نادرێت".
|