عێراق رەنگی واژۆی بەرپرسانی دیاری کرد؛ سووری تۆخ بۆ باڵاترینەکانە

ئەمینداریێتیی گشتیی ئەنجوومەنی وەزیرانی عێراق لە نووسراوێکی فەرمیدا، رەنگی ئەو پێنووسانەی دیاری کردووە کە دەبێت بەرپرسانی باڵا و فەرمانبەرانی حکومەت بۆ واژۆکردنی نووسراوە فەرمییەکان بەکاریبهێنن، بە جۆرێک رەنگی سووری تۆخ بۆ چوارە سەرۆکایەتییەکە و رەنگی شین بۆ فەرمانبەرانی ئاساییە.

بەگوێرەی نووسراوێک کە رۆژی 29-07-2025 دەرچووە و وێنەیەکی دەست تۆڕی میدیایی رووداو کەوتووە، حەمید نەعیم غزی، ئەمینداری گشتیی ئەنجوومەنی وەزیرانی عێراق، فەرمانەکەی ئاراستەی سەرجەم وەزارەت، پارێزگا و ئەنجوومەنی پارێزگاکان کردووە.
 
رەنگەکان بەگوێرەی پلە و پۆستی بەرپرسان بەمشێوەیە دابەش کراون:
 
یەکەم: رەنگی سووری تۆخ؛ تەرخانکراوە بۆ واژۆی هەر یەک لە:
 
- سەرۆککۆمار
- سەرۆکوەزیران
- سەرۆکی پەرلەمان
- سەرۆکی ئەنجوومەنی باڵای دادوەری
- سەرۆکی دادگەی باڵای فیدراڵی
 
دووەم: رەنگی سووری کاڵ؛ بۆ واژۆی:
 
- جێگرانی سەرۆککۆمار، سەرۆکوەزیران و سەرۆکی پەرلەمان
- وەزیر و ئەوانەی بە پلەی وەزیرن
- پارێزگارەکان و سەرۆکی ئەنجوومەنەکان
 
سێیەم: رەنگی سەوز؛ بۆ واژۆی:
 
- بریکارانی وەزارەتەکان و ئەوانەی بە پلەی بریکارن
- خاوەن پلە تایبەتەکان
- بەڕێوەبەرە گشتییەکان و سەرۆکی دەستەکان
- سەرۆکی یەکێتی، سەندیکا و رێکخراوە ناحکومییەکان
 
چوارەم: رەنگی رەش؛ تەنیا بۆ واژۆکردنی:
 
- پەیماننامە و رێککەوتنە نێودەوڵەتییەکان (بەگوێرەی یاسای ژمارە 35ـی ساڵی 2015)
- یاداشتەکانی لێکتێگەیشتن
 
پێنجەم: رەنگی شین؛ بۆ واژۆی:
 
- سەرجەم فەرمانبەران، لە پلەی یاریدەدەری بەڕێوەبەرەوە بۆ خوارەوە.