کورد تا موحتاجی بەغدا بێت ناتوانێ سەربەخۆ بێ..

کورد لە عێراق هەتا موحتاجی دەسەڵاتدارانی ویلایەتی بەغداو دەوڵەتی فەقیە بێ، بۆ نان و پۆست و موچەو ئیمتیاز، دڵنیابن ناتوانێ سەربەخۆبێ و باسی ئازادی و دەوڵەتداریی و حوکمی موئەسەساتی خۆی بکات.

کورد لە سوریا واتە ڕۆژاڤا، چونکە خەریکی ئیکتیفای زاتی خۆیەتی و ساڵی پار هەر بەڕۆنی زەیتونەکەی و پەمووەکەی و بڕێک لەنەوتەکەی و داهاتی مەرزەکانی بودجەو دەخلی هاوڵاتیەکانی پڕکردەوەو زیادەشی هەبوو نەک کورتهێنان.

دەی هێزی وا پێویستی بە مەرکەزیەتی دیمەشق نیەو لەسەر قاچی خۆی وەستاوە، دەسەڵاتدارانی ئەمەوی تازەو کۆنی دیمەشق و شام پێویستیان بە ئەنجومەنەکانی خۆسەر هەیە، لەکورتترین مانادا ئەوە ڕاڤەی شۆڕشە.

ئەوەندە ملکەچیی و تەسلیم بوون بۆ دەوڵەتی مەرکەزیی و قودسیەتی نەتەوەی باڵادەست و زۆرینەی داسەپاو، کەسەدان ساڵە کوردیان دابەش و بێئیرادە کردەوە هیچ بەرەنجامێکی نابێ.

رۆحی كوردبوون و گوتارەکەی ئاوا شپرزه‌یه‌ له‌به‌رده‌م هەژموونی نەتەوەکانی سەردەست و مەرکەزیەتێکی مۆنۆکرات و داسەپاودا، وه‌ك بڵێی کورد تاوانباره‌و چاوه‌ڕوانی سزادان و حوكمدان دەکات لەلایەن ئەوانی ترەوە، تکایە واز لەو چیرۆکە بێتامە دیبلۆماسیە بهێنن، چەمکی برایەتی درۆینەی کوردو عەرەب بخەنەلاوەو لەسەر پێی خۆتان بوەستن و ئەو دارشەقە فڕێ بدەن.

ئه‌م رۆحه‌ شپرزەو هیلاکە، ئەم مامەڵەی خۆبچووککردنەوەیە لەبەردەم پایتەختە سێنتڕاڵەکان و دیوەخانەکانی نەتەوەی سەردەست، هه‌رگیز به‌رگریی پێناكرێ و ئیرادەی پێ دروست ناکرێ و بیری نەتەوەیی پێ ڕێک ناخرێتەوە، دواجار هه‌رگیز ناسیۆنالیزم و هێڵی ستراتیجی نیشتیمانی و دەوڵەتی پێ دروست ناكرێت.