نێچیرڤان بارزانی: ئه‌ركی هه‌مو لایه‌كمانه خزمه‌تی هه‌ڵه‌بجه بكه‌ین
2025-04-14
417 جار خوێنراوەتەوە
نێچیرڤان بارزانی سه‌رۆكی هه‌رێمی كوردستان له‌په‌یامێكدا به‌بۆنه‌ی ده‌نگدان به پارێزگاكردنی هه‌ڵه‌بجه له‌لایه‌ن په‌رله‌مانی عێراقه‌وه رایگه‌یاند، "هیوادارین ببێته هۆی باشتربونی ژیان و گوزه‌ران و بوژانه‌وه و گه‌شانه‌وه و پێشكه‌وتنی هه‌ڵه‌بجه له هه‌مو بواره‌كاندا، ئه‌ركی هه‌مو لایه‌كمانه بێ درێغیكردن، ئه‌وپه‌ڕی خزمه‌تی هه‌ڵه‌بجه بكه‌ین".
نێچیرڤان بارزانی له‌په‌یامێكدا بڵاویكرده‌وه، "به بۆنه‌ی ده‌نگدان و په‌سه‌ندكردنی ئه‌مڕۆی ئه‌نجومه‌نی نوێنه‌رانی عێراقه‌وه له‌سه‌ر به‌پارێزگابونی هه‌ڵه‌بجه، به گه‌رمی پیرۆزبایی له خه‌ڵكی هه‌ڵه‌بجه و ته‌واوی هه‌رێمی كوردستان ده‌كه‌م، سوپاس و پێزانین و ده‌ستخۆشی پێشكه‌ش به ئه‌نجومه‌نی نوێنه‌رانی عێراق و هه‌مو لایه‌ك له هه‌رێمی كوردستان و عێراق ده‌كه‌م كه له‌م پرۆسه درێژه‌دا هاوكار و یارمه‌تیده‌رمان بون، ئه‌مه مایه‌ی ئه‌وپه‌ڕی خۆشحاڵیی ئێمه و ته‌واوی گه‌لی كوردستانه".
راشیگه‌یاندوه، بۆ خزمه‌تكردنی باشتری خه‌ڵكی هه‌ڵه‌بجه، ئێمه هه‌ر زو له هه‌رێمی كوردستان پرۆسه‌ی به‌پارێزگاكردنی هه‌ڵه‌بجه‌مان ده‌ست پێكرد، ته‌واوبونی ئه‌مڕۆی ڕێكاره‌كانی له عێراق و به فه‌رمی ناساندنی وه‌ك پارێزگا، كه‌مترین پاداشتی قوربانی و ئێش و ئازاری هه‌ڵه‌بجه و خه‌ڵكه تێكۆشه‌ره‌كه‌یه‌تی".
سه‌رۆكی هه‌رێمی كوردستان ده‌شڵێت، "هیوادارین ببێته هۆی باشتربونی ژیان و گوزه‌ران و بوژانه‌وه و گه‌شانه‌وه و پێشكه‌وتنی هه‌ڵه‌بجه له هه‌مو بواره‌كاندا، ئه‌ركی هه‌مو لایه‌كمانه بێ درێغیكردن، ئه‌وپه‌ڕی خزمه‌تی هه‌ڵه‌بجه بكه‌ین".
|