بافڵ تاڵه‌بانی: به‌پارێزگاكردنی هه‌ڵه‌بجه به‌رپرسیارێتیمان زیاتر ده‌كات
2025-04-14
256 جار خوێنراوەتەوە
بافڵ جه‌لال تاڵه‌بانی سه‌رۆكی یه‌كێتیی نیشتمانیی به‌بۆنه‌ی په‌سه‌ندكردنی پرۆژه‌یاسای به‌پارێزگابوونی هه‌ڵه‌بجه‌وه له‌لایه‌ن ئه‌نجومه‌نی نوێنه‌رانی عیراقه‌وه په‌یامێكی بڵاوكرده‌وه‌و ڕایگه‌یاند:" هه‌ڵه‌بجه‌ییه سه‌ربه‌رزه‌كان شایه‌نی هه‌موو پاداشت و خزمه‌تكردنێكن و ئامۆژگاریی سه‌رۆك مام جه‌لاله كه هه‌رچیمان له‌ده‌ستبێت ده‌بێت بۆ هه‌ڵه‌بجه‌ی بكه‌ین".
ده‌قی په‌یامه‌كه:
ئه‌مڕ‌ۆ رۆژێكی مێژووییه، منیش هێنده‌ی هه‌ڵه‌بجه‌ییه سه‌ربه‌رزه‌كان دڵخۆشم، چونكه گه‌یشتین به یه‌كێك له‌و ئامانجانه‌ی چه‌ند ساڵێكه هه‌وڵی بۆ ده‌ده‌ین تاوه‌كو كه‌مێك له ئازاری كه‌سوكاره‌كانی خۆمان كه‌م بكه‌ینه‌وه.
له دڵه‌وه سوپاس و پێزانینی بێپایانم ئاراسته‌ی هه‌موو ئه‌و كه‌س و لایه‌نانه ده‌كه‌م كه هه‌وڵیان بۆ به‌پارێزگاكردنی هه‌ڵه‌بجه داوه و له رابردوودا په‌رۆشانه له هه‌وڵدابوون بۆ سه‌رخستنی ئه‌م بڕ‌یاره مێژووییه.
به‌پارێزگاكردنی هه‌ڵه‌بجه به‌بیرمان ده‌هێنێته‌وه كه هه‌موومان یه‌ك چاره‌نووس و مێژووی هاوبه‌شی پڕ له قوربانیدان و شانازیمان هه‌یه و ئومێدمان پێده‌خشێت كه به یه‌كگرتوویی و پێكه‌وه‌ییمان ده‌توانین خزمه‌تی زیاتری گه‌له‌كه‌مان بكه‌ین.
هه‌ڵه‌بجه‌ییه سه‌ربه‌رزه‌كان شایه‌نی هه‌موو پاداشت و خزمه‌تكردنێكن، دڵنیاتان ده‌كه‌مه‌وه چۆن له رابردوودا هه‌میشه له‌گه‌ڵتان بووین، ئێستاش به هه‌مان رۆحیه‌ته‌وه به‌رده‌وام ده‌بین و پارێزگاری له مافه‌كانتان ده‌كه‌ین.
لای ئێمه هه‌ڵه‌بجه هیوایه بۆ ئاینده‌مان، ئامۆژگاریی سه‌رۆك مام جه‌لاله كه هه‌رچیمان له‌ده‌ستبێت ده‌بێت بۆ هه‌ڵه‌بجه‌ی بكه‌ین و به‌پارێزگابوونیشی به‌رپرسیارێتیمان زیاتر ده‌كات، ئێستا كاتی ئه‌وه‌یه به دڵسۆزی و خه‌مخۆرییه‌وه وه‌ك یه‌ك تیم به پرۆژه و كاركردن خزمه‌تی خه‌ڵكی خۆشه‌ویستی هه‌ڵه‌بجه بكه‌ین.
هه‌ر شاد و سه‌ربه‌رزبن
بافڵ جه‌لال تاڵه‌بانی
سه‌رۆكی یه‌كێتیی نیشتمانیی كوردستان
|