شێخ جەعفەر داوای ئاشتبوونەوەی لایەنەکانی هەرێم دەکات

جێگری سەرۆی هەرێمی کوردستان دەڵێت ئەگەر بمانەوێ ئەم پاڵپشتیانە بەردەوامی هەبێت، دەبێت ئاشتبوونەوە و یەکڕیزی نێوان لایەنە سیاسییەکان بکەین بە بنەمای پاراستنی ئەو هەرێمەی کە پاڵپشت بە بڕیاری (٦٨٨)ی ئەنجوومەنی ئاسایشی نێودەوڵەتیی هاتە بوون، چونکە مەترسییەکان تاکو ئێستاش هەڕەشەن بۆ پێگە و لەباربردنی هەرێمەکەمان.

پەیامی جێگری سەرۆک لە ساڵیادی دەرچوونی بڕیاری (٦٨٨)ی ئەنجوومەنی ئاسایشی نێودەوڵەتیەوە

بڕیاری (٦٨٨)ی ئەنجوومەنی ئاسایشی نێودەوڵەتیی لە (١٩٩١/٤/٥)دا لە ئەنجوومەنی ئاسایشی نەتەوە یەکگرتووەکاندا، پاڵپشت بە بەشی حەوتەمی دەستووری ڕێکخراوی نەتەوە یەکگرتووەکان دەرچوو، کە بریتی بوو لە بڕیاری ناوچەی دژە فڕین لە سەرووی هێڵی (٣٦)وە، ئەو بڕیارە دوای ئەوە هات کە ڕژێمی بەعسی لەناوچوو ڕاپەڕینەکەی بەهاری ساڵی (١٩٩١)ی سەرکوت کرد و خەڵکی کوردستانی ڕووبەڕووی کۆڕەوێکی ملیۆنی کردەوە.

ئەمڕۆ (٣٤) ساڵ تێدەپەڕێت بەسەر ئەم بڕیاڕە گرنگ و مێژووییەی کە بووە هۆی پارێزگاریکردن لە خاک و نەتەوە و گەلی کوردستان، هەروەها بوو بە ئامرازێکی گرنگ بۆ بنیاتنان و گواستنەوەی خەباتی شۆڕشگێری بۆ قۆناغی ئەزموونکردنی کاری سیاسیی و گەیشتن بە ئامانجە نەتەوەیی و مافە ڕەواکانی گەلێکی چەوساوە، لە هەمووی گرنگتر دیاریکردنی سنووری جوگرافیی و ڕێگریکردن لە دووبارە بوونەوەی کارەساتی تراژیدیی و بە جینۆسایدکردنی نەتەوەی کورد بوو.

بڕیاری (٦٨٨)ی ئەنجوومەنی ئاسایشی نێودەوڵەتی، بۆ یەکەمجار هەڵبژاردنی پەرلەمانی کوردستانی لە پڕۆسەیەکی دیموکراسی بەرهەمهێنا و بووین بە خاوەن حکومەتێکی خۆماڵیی و گەیشتن بەم قۆناغەی ئەمڕۆ کە خاوەن قەوارەی هەرێمی کوردستانین.

لەم یادەدا، نابێت ڕۆڵی کاریگەر و پشتیوانی کۆمەڵگەی نێودەوڵەتیی و وڵاتانی وەک ئەمەریکا و بەریتانیا و فەرەنسا و ڕووسیا و چەند ووڵاتێکی ترمان بیر بچێت، بۆیە هەمیشە سوپاسگوزاریانین، هەروەها سوپاسی هاوکاریی و هەستی پڕ لە مرۆڤایەتیی ووڵات و گەلی ئێران و تورکیاش دەکەین بۆ واڵاکردنی سنورەکانیان و لە ئامێزگرتن و حەوانەوەی سەدان هەزار پەنابەری خەڵکی کوردستان.

لێرەدا گرنگە پاڵپشتییە نێودەوڵەتییەکان بە گرنگ سەیر بکەین، ئەگەر بمانەوێ ئەم پاڵپشتیانە بەردەوامی هەبێت، دەبێت ئاشتبوونەوە و یەکڕیزی نێوان لایەنە سیاسییەکان بکەین بە بنەمای پاراستنی ئەو هەرێمەی کە پاڵپشت بە بڕیاری (٦٨٨)ی ئەنجوومەنی ئاسایشی نێودەوڵەتیی هاتە بوون، چونکە مەترسییەکان تاکو ئێستاش هەڕەشەن بۆ پێگە و لەباربردنی هەرێمەکەمان.

شێخ جەعفەر شێخ مستەفا 
جێگری سەرۆکی هەرێمی کوردستان