چارەنووسی 20 کۆچبەری کورد لە وڵاتی لیبیا بە نادیاری ماوەتەوە
55 خولەک پێش ئێستا
19 جار خوێنراوەتەوە
لەکاتێکدا کۆچی گەنجان بەرەو ئەورووپا بەردەوامە، هێشتا دەیان کۆچبەری کورد لە وڵاتی لیبیا بێسەرووشوێنن و چارەنووسیان نادیارە.
ئەبوبەکر عەلی، سەرۆکی کۆمەڵەی پەنابەرە گەڕاوەکانی ئەورووپا لە کۆنگرەیەکی ڕۆژنامەوانیدا لە ڕانیە ڕایگەیاند: دوێنێ 20ـی مانگ، 36 کۆچبەری کورد لەلایەن دەزگای نیشتمانیی پاراستنی وڵاتی لیبیاوە لەژێر دەستی مافیا و قاچاخچییەکان ڕزگار کران، کە ماوەیەک بوو کەسوکاریان لێیان بێهەواڵ بوون و مەترسی لەسەر ژیانیان هەبوو.
سەرۆکی کۆمەڵەکە ئاشکراشی کرد کە هێشتا 20 کۆچبەری گەنجی کورد بێسەرووشوێنن و هیچ کەسێک نازانێت لە کوێن. لەو ژمارەیەش هەشت کەسیان لە مانگی سێی ئەمساڵەوە و 12 کەسەکەی دیکەش لە سەرەتای ئەم مانگەوە لە وڵاتی لیبیا بێهەواڵن.
کۆمەڵەی پەنابەرە گەڕاوەکان بەتووندی هۆشداری دەدات و داوا لە گەنجان و خێزانەکانیان دەکات کە بە هیچ شێوەیەک ئەو ڕێگا پڕمەترسییانە هەڵنەبژێرن، چونکە ڕاستەوخۆ ژیان و چارەنووسیان دەکەوێتە مەترسییەوە.
کۆچی گەنجان لە هەرێمی کوردستان، بەتایبەت لە سنووری ئیدارەی ڕاپەڕین بەرەو وڵاتانی ئەورووپا بەردەوامە، ئەو ڕێگایانەی کۆچبەران هەڵیاندەبژێرن پڕ لە مەترسین و بەشێکی زۆریان دەکەونە دەست گروپە مافیاکان و قاچاخچییەکان، بەمەش چارەنووسیان نادیار دەبێت و ژیانیان دەکەوێتە مەترسییەوە.
|