بۆچی قسەکانی پارێزگار تورکمانەکەی کەرکووک کورد ڕاناچڵەکێنی؟

محەمەد سەمعان بۆچی وا دەکات و ڕێزی کورد و پێکهاتەکانی کەرکووک ناگرن؟

 ماوەیەکە محەمەد سەمعان پارێزگارە تورکمانەکەی کەرکووک بە تۆنێکی بەرز و پڕ بە گەرووی دژی کورد و بەرژەوەندییەکانی کورد و ماددەی لەبیرکراوی ١٤٠ قسەی بەرز و نزم دەکات.. 

جارێک بێ پرسی ئەنجومەنی پارێزگای شارەکە کورکووک دەخاتە ناو شارەوانییەکانی تورکیا و جارێک بێ گوێدابە هیچ دەڵێت کەرکووک شارێکی تورکمانییە و ئێستاش هاوار دەکات  مادەی ١٤٠ نەگونجاوبووەو نابێ باسیشی بمێنێ..

بەڵام سەیرەکە لەوەدایە.. کورد و لایەنەکان بە تایبەتی بەرپرسانی پارتی و یەکێتیی وەک پێویست دەنگیان نیەو خەڵکیش لە بێدەنگی دەسەڵاتدارە کوردەکان سەریان سوڕمانە

پارتی یەکێتی وەک دوو هێزی چەکدار کە کۆنترۆڵی باشووری کوردستانیان کردووە، بە تەواوی کەرکووک و ناوچە دابڕێنراوەکانیان خستووەتە دەرەوەی بەرژەوەندیەکانی خۆیان.

 ئەوەش وای کردووە بەردەوام خەڵکی ئەو ناوچەیە لە ژێر تعریب و چەوساندنەوەی عەرەبی هاوردە، حەشتی شەعبی و سوپای عێراق و ئێستاش قسە ئیهانییەکانی سەمعانی تورکمان بن.

 لە دوای ڕووداوەکانی شازدەی ئۆکتۆبەر، ئەم دوو هێزە سیاسییە ئەوەندەی سەرقاڵی ئەوە بوون کە یەکتر بە خیانەتکار و خاکفرۆش ناوزەند بکەن، ئەوەندە لە خەمی گەڕانەوەی کورد بۆ ئەو ناوچانە نەبوون. 

ئەم دوو هێزە هەریەکەیان بە ئەندازەی ئەوی دیکەیان نابەرپرسیارانە مامەڵەیان لەگەڵ ئەو پارچە گەورەیەی کوردستان کردووە و بەردەوام لە پێناو دەسکەوتی تایبەتی و حزبی مامەڵەیان بە چارەنووسی ئەوە کردووە.

 بەهۆی لاوازی پێگەی کورد لە ناو عێراق بە گشتی و لە ناوچە دابڕێنراوەکان بە تایبەتی، عەرەبە هاوردەکان ساڵ دوای ساڵ تەنگی زیاتر بە جوتیارە کوردەکان هەڵدەچنێن، لە کاتێکدا کورد نوێنەرایەتییەکی گەورە لە ناو عێراق و دامەزراوە فیدراڵیەکان دەکات.

دەیان پەرلەمانتار و وەزیر و فەرماندەی سەربازی باڵای کورد لە سەر و هەمووشیانەوە سەرۆکی کۆمار لە ناو دامەزراوەکانی دەوڵەتی بەناو فیدراڵی عێراق بوونیان هەیە، کەچی بە هەموویانەوە نەیان توانیوە کێشەی ناوچەدابڕتندراوەکان و ناوچەکانی ١٤٠ و تەنانەت ئەو جوتیارە کوردانە چارەسەر بکەن کە لە سەر ئاو و خاکی خۆیان دەردەگرێن.

ئەگەر ڕۆژگارێک کورد بە بێ چەک و پارە لە کەرکووک و ناوچە کوردستانیەکانی دەرەوەی ئیدارەی هەرێم تعریب کرابێت، ئەوا ئێستا لە پاڵ بوونی پێشمەرگە و چەندین هێزی هەواڵگری و پێگە و پۆستی گرنگدا تعریب و بچووک دەکرێتەوە.

هەمووان بە میدیا و چالاکوان و ڕێکخراوەکانی کۆمەڵگەی مەدەنی ئەو پارچە گەورەیەی باشووری کوردستانیان لەبیر کردووە.

تەنانەت تاکە ڕێکخراوێکش لە سەریان بە دەنگ نەهاتووە و چالاکییەکی دژی ئەو قسە بێ سەروبەرانەی محەمەد سەمــعان و  تعریب کردنە بەردەوامە ئەنجام نەداوە.