چۆن لە ڕەمەزاندا خۆمان لە دڵەکزێ بپارێزین؟

ئەگەر بمانەوێت خۆمان لە دڵەكزێ بپارێزین لە ڕەمەزاندا دەبێت بەربانگ کردنەوەمان بە دەنکێک خورما یان پەرداخێکی بچووک ئاو بێت، کە زۆر سارد و سەهۆڵاو نەبێت، هەروەها دوورکەوینەوە لە شیرینییە دەستکردەکان و شەربەتی گیراوە.

د. هێمن مەحمود پسپۆری نەخۆشییەکانی جومگە و ڕۆماتیزم و ئێسک و فەقەرات لە نووسینێكدا ئاماژە بەوە دەكات چۆن خۆمان لە دڵەکزێ بپارێزین لە مانگی پیرۆزی ڕەمەزاندا .

دەقی نووسینەكەی:-

بەربانگ کردنەوەمان بە دەنکێک خورما یان پەرداخێکی بچووک ئاو، کە زۆر سارد و سەهۆڵاو نەبێت، دوورکەوینەوە لە شیرینییە دەستکردەکان و شەربەتی گیراوە.

لەدوای بەربانگکردنەوە یەکسەر جگەرە نەکێشرێت.

دوورکەوینەوە لە خواردنی سوورەوەکراو و بەهاراتی زۆر و توونی و ترشی و خواردنی چەور و ژەمی قورس.

دوای نانخواردن یەکسەر پاڵنەکەوین و نەخەوین.

ئەو کەسانەی حەبی دژەترشەڵۆکیان هەیە لەگەڵ ڕۆژوو شکاندن حەبەکەیان بخۆن پێش نانخواردن بە نیو سەعاتێک.

خواردن بەهێواشی بخۆین و جوان بیجووین و پەلەنەکەین.

لە دوای نانخواردن یەکسەر چاو و قاوە نەخۆینەوە.

دوورکەوتنەوە لە خواردنی پیاز و سیر و ترشیات و ئەو خواردنانەی دۆشاوی تەماتە و کەچەب و ساسیان زۆر تیایە.

خواردنەوەی بڕێکی باش لەئاو لە کاتەکانی شەو لەنێوان بەربانگ تا پارشێو.

دوورکەوتنەوە لەو عیلاجانەی ئازاری گەدە ئەدەن وەک ڤۆڵتارین و پۆنستان و پرۆفین(دەرمانەکانی گرووپی NSAIDs)،گەر کەسێک پێویستی بە عیلاج و ئازارشکێن هەبو ڕاوێژ بە پزیشک بکات.