یەکێتیی زانایانی ئایینی: کڕین و فرۆشتنی کارتی دەنگدان حەرامە

یەکێتیی زانایانی ئایینیی ئیسلامیی کوردستان بازرگانیکردن بە کارتی دەنگدانەوە حەرام دەکات و وتەبێژەکەی دەڵێت، "کڕین و فرۆشتنی دەنگ گەندەڵیی سیاسی، تەزویر و خیانەت لە ئەمانەت دروست دەکات."
 
د. عەبدوڵڵا شێرکاوەیی، وتەبێژی یەکێتیی زانایانی ئایینیی ئیسلامیی کوردستان بە ٧ڕۆژی راگەیاند، "کڕین و فرۆشتنی دەنگ و کارتی دەنگدان هۆکاری گەندەڵییە و حەرامە، چونکە بە پێوەری خۆی بەڕێوەناچێت."
 
وتەبێژی یەکێتیی زانایانی ئایینیی ئیسلامیی باسی لەوەش كرد، هەڵبژاردن "ئەمانەتە" و دەستنیشانکردنی کەسێکە کە شیاوی ئەوە بێت پۆست و بەرپرسیارێتی وەربگرێت، جێی ئومێدی داهاتووی گەل و نیشتمان بێت، کەواتە بەشداریکردن لە پرۆسەی هەڵبژاردن و دەستنیشانکردنی کەسی شیاو، بەرپرسیارێتیەکی ئایینی و نیشتمانییە.
 
بە وتەی شێرکاوەیی، "کڕین و فرۆشتنی دەنگ لێکەوتەی خراپ بۆ داهاتووی وڵات دروست دەکات و پرۆسەی هەڵبژاردن دەشێوێنێت، کەسی نەشیاو دەباتە پێشەوە، گەندەڵیی سیاسی، تەزویر و خیانەت لە ئەمانەت دروست دەکات."
 
یەکێتیی زانایانی ئایینی کوردستان جەخت لە هەڵبژاردنێکی هێمن و ئارام دەکاتەوە، وتەبێژەکەی دەڵێت، "گرنگە هەڵبژاردن بە شێوەیەکی ئازاد، ئاسایی و مەدەنی بەڕێوەبچێت و رەچاوی پێوەری یاسایی و شەرعی بکرێت."
 
روونیشكردەوە، هیچ رێگرییەک بۆ بەشداریکردن لە هەڵبژاردن نییە ئەگەر رەچاوی بەرژەوەندی گشتی، گەل و نیشتمان بکرێت، بەڵام بە پێچەوانەوە ئەگەر ببێتە هۆکاری فەساد حەرامە.