ناوه‌ڕۆكی كۆبونه‌وه‌كه‌ی ئه‌نجومه‌نی سه‌ركردایه‌تی یه‌كێتی
15 کاتژمێر پێش ئێستا
171 جار خوێنراوەتەوە
له‌كۆبونه‌وه‌ی ئه‌نجومه‌نی سه‌ركردایه‌تی یه‌كێتیی نیشتمانیی كوردستاندا، بافڵ جه‌لال تاڵه‌بانی سه‌رۆكی ئه‌و حزبه رایگه‌یاند، "به پێكه‌وه‌ییمان و یه‌كڕیزمان له هه‌رێم ده‌توانین داكۆكی له شایسته داراییه‌كانی خه‌ڵكه‌كه‌مان بكه‌ین و ئارامی و ئاسایشی وڵاته‌كه‌مان باشتر بپارێزین".
به‌گوێره‌ی راگه‌یه‌ندراوێكی ئه‌نجومه‌نی سه‌ركردایه‌تی، ئه‌مڕۆ چوارشه‌ممه ئه‌نجومه‌نی سه‌ركردایه‌تی یه‌كێتیی نیشتمانیی كوردستان به سه‌رپه‌رشتی بافڵ جه‌لال تاڵه‌بانی، سه‌رۆكی یه‌كێتی له هۆڵی كۆبونه‌وه‌كانی مه‌كته‌بی سیاسی له سلێمانی كۆبوه‌وه.
دەقی راگەیەندراوەكە:
كۆبوونەوە تەرخانكرا بۆ گفتوگۆكردن لەسەر دواپێشهاتەكانی پرسی مووچەو گوزەرانی هاووڵاتیانی هەرێمی كوردستان و دیاردەی دزێوی پەلاماردانی شوێنە جیاجیاكانی كوردستان بە درۆن و بە ئامانجگرتنی دامەزراوە ئابوورییەكان .
سەركردایەتی یەكێتی بە توندی ئیدانەی ئەو جۆرە رەفتارە دوژمنكارانەی كرد كە مەرام لێی زیان گەیاندنە بە ئاسایش و ئارامی و ئابووری وڵاتەكەمان و گوشارخستنە سەر قەوارەی هەرێم .
كۆبوونەوە داواشیكرد حكومەتی فیدڕاڵ بەرپرسیارێتی نیشتمانیی و رەسمی و دەستووریی خۆی راپەڕێنێت بەرامبەر ئەمنیەتی هاووڵاتیانی كوردستان و ئەوانەی هەڵدەستن بەو تاوان و پێشێلكاریانە رووبەڕووی دادگایان بكەنەوە و رێگا نەدەن درزی ئەمنی قووڵ بێتەوە.
بەشێكی تری كۆبوونەوەی ئەنجوومەنی سەركردایەتی تەرخانكرا بۆ گفتوگۆكردن لەسەر دۆخی هەستیار و خراپی ژیان و گوزەرانی كۆمەڵانی خەڵك، بە تایبەت پێویستی رێككەوتن لەگەڵ بەغدا و دابینكردنی مووچەی فەرمانبەران و بوژاندنەوەی بازاڕ و ئاوەدانی .
كۆبوونەوە تەئكیدی لەسەر ستراتیژی كوردستانی و پێكەوەیی بۆ رێككەوتن لەگەڵ حكومەتی فیدڕاڵ كردەوە و دەستخۆشی لە هەوڵەكانی سەرۆك بافڵ و تیمی كوردستانی كرد لە چارەسەركردنی ئەو پرسە.
سەرۆك بافڵ جەلال تاڵەبانی وێڕای دەستخۆشی لەهەوڵەكانی چارەسەركردنی كێشەی مووچە و ئومێدی سەرخستنی هەوڵەكان و پابەندبوونی هەموولایەك پێوەی روونیكردەوە ئەوەی بەدەست هاتووە بەرهەمی یەكڕیزی و پێكەوەیی هەڤاڵانی سەركردایەتیی یەكێتییەكەمانە كە پشتیوانمانن و دەستكراوەیان كردووین بۆ داكۆكی زیاتر لە ویست و گوزەرانی كۆمەڵانی خەڵكی كوردستان. ئاماژەی بۆ ئەوەشكرد بە پێكەوەییمان و یەكڕیزمان لە هەرێم دەتوانین داكۆكی لە شایستە داراییەكانی خەڵكەكەمان بكەین و ئارامی و ئاسایشی وڵاتەكەمان باشتر بپارێزین .
كۆبوونەوە هەروەها چەند پرسێكی تری سیاسی تاوتوێكرد و هەڵسەنگاندیان بۆ كرا .
|