رۆناڵدۆ و جیسوس؛ ئاڵۆزییەکان لە پۆرتوگال بەرەو تەقینەوە دەچن
2 کاتژمێر پێش ئێستا
34 جار خوێنراوەتەوە
رووبەڕووبوونەوەی نەرویج بەرامبەر پورتوگال، بە قەیرانێک بۆ کریستیانو رۆناڵدۆ کۆتایی هات، دوای ئەوەی بۆ ماوەی 90 خولەکی تەواوی یارییەکە لەسەر کورسیی یەدەگ مایەوە.
ئەم بابەتە زیاتر دەنگۆ و ئاڵۆزیی دروستکرد کاتێک هەواڵە دزەپێکراوەکان دووپاتیان کردەوە کە یاریزانەکە بەهۆی رەفتارەکانی خۆرخێ جیسوس، راهێنەری نوێی هەڵبژاردەی پۆرتوگال زۆر تووڕە بووە.
رۆژنامەی 'ریکۆرد'ی پۆرتوگالی ئاگری کێشەکەی خۆشتر کرد، دوای ئەوەی زانیاریی دەربارەی قەیرانێکی گەورە بڵاوکردەوە کە رووبەڕووی ئەستێرە پۆرتوگالییەکە دەبێتەوە؛ ئەمەش رەنگە لە کۆتاییدا ناچاری بکات بڕیاری وازهێنان لە یاریی نێودەوڵەتی بدات.
شۆکی کورسیی یەدەگ و پشتگوێخستنی بەڵێنەکان
پەیوەندیی نێوان کاپتنی پۆرتوگال و راهێنەرە نوێیەکەی چووە نێو تونێلێکی تاریکەوە، دوای ئەوەی گۆڵکارە مێژووییەکە بۆ ماوەی 90 خولەکی تەواو لە یاریی بەرامبەر نەرویج لەسەر کورسیی یەدەگ مایەوە.
کێشەکە تەنیا بڕیارێکی تەکتیکی نەبوو، بەڵکو پەیوەست بوو بە شکاندنی بەڵێن و رێککەوتنە ناڕاستەوخۆکانی نێوان هەردوولا، چونکە یاریزانەکە چاوەڕێی جێبەجێکردنی بەڵێنێک بوو بۆ بەشداریکردنی بەلایەنی کەمەوە بۆ ماوەی نیو کاژێر لەسەر چیمەنی یاریگا.
ئەم رەفتارە چاوەڕواننەکراوە زەبرێکی گەورە بوو بۆ کاپتنەکەی نەسڕ، بەتایبەت کە خۆی هۆکاری سەرەکی بوو لە هێنانی جیسوس بۆ راهێنەرایەتی هەڵبژاردەکە، بەمەش پاڵپشتیکاری سەرەکی بووە یەکەم قوربانی لە پێکهاتەی راهێنەردا.
تووڕەیی و چوونەدەرەوەی خێرا
رۆناڵدۆ نەیتوانی دۆخی یەدەگبوون قبووڵ بکات، بۆیە راستەوخۆ دوای فیکەی کۆتایی ناوبژیوان، وەڵامێکی خێرا و شۆکهێنەری دایەوە.
لە کاتێکدا یاریزانانی پۆرتوگال و دەستەی راهێنەران لە ناوەڕاستی یاریگا کۆببوونەوە بۆ ئاهەنگێڕان بەبۆنەی سەرکەوتنەکە و سڵاوکردن لە هاندەران، رۆناڵدۆ بە تەنیا و بە روخسارێکی تووڕەوە رووی لە ژووری جلگۆڕین کرد، بێ ئەوەی ئاوڕێکیش بداتەوە.
نەرویج بڕوانامەی متمانە دەبەخشێتە راهێنەر
گەورەترین مەترسی کە رووبەڕووی ئایندەی کاپتنەکەی پۆرتوگال دەبێتەوە تەنیا دانیشتنی نییە لەسەر کورسیی یەدەگ، بەڵکو سەرکەوتنی سیستمی هەڵبژاردەکەیە بەبێ ئەو.
هەڵبژاردەی پۆرتوگال سەرکەوتنێکی بەنرخی لە دەرەوەی یاریگای خۆی بەرامبەر نەرویج بە ئەنجامی دوو گۆڵ بەرامبەر گۆڵێک بەدەستهێنا، ئەم سەرکەوتنەش بڕوانامەی متمانەی تەواوی بەخشییە جیسوس لەبەرامبەر گوشاری هاندەران و رەخنەی رۆژنامەکان.
|