راگەیێنراوی یانەی هەولێر لەبارەی هێرشکردنە سەر هاندەرانی
2 کاتژمێر پێش ئێستا
44 جار خوێنراوەتەوە
یانەی هەولێر راگەیێنراوێکی لەبارەی هێرشکردنە سەر هاندەرانی یانەکەی بڵاوکردەوە و داوای سزادانی هێرشکاران دەکات.
یانەی هەولێر لە راگەیێنراوەکەیدا پاڵپشتیی خۆی بۆ هاندەرانی دووپاتدەکاتەوە و داوا دەکات لایەنە پەیوەندیدارەکان و یاسا ئەرکی خۆیان بەتەواوی جێبەجێ بکەن و مافی هاندەرانی یانەکە پارێزراوبێت.
دەقی راگەیێنراوی یانەی هەولێر
دەستەی کارگێری یانەی وەرزشی هەولێر بەداخەوە و بە توندی هەڵوێستی و ناڕەزایی خۆی دەربڕێت لەسەر ئەو ڕووداوە ناخۆش و مەترسیدارە و ترسنۆکانەی دوای کۆتاییهاتنی یاریی یانەکەمان بەرامبەر یانەی شورتە لە شاری بەغدا روویدا.
دوای تەواوبوونی یارییەکە، لە کاتێکدا هاندەرانی یانەکەمان بە ئارامی و بێ هیچ کێشەیەک یاریگەیان بەجێدەهێشت، بەداخەوە کۆمەڵێک لە هاندەرانی یانەی شورتە هێرشێکی ترسنۆکانە و نامرۆڤانەیان کردە سەر هاندەرانی یانەکەمان و پاسەکانی گواستنەوەی هاندەرانمان.
ئەم هێرشە تەنیا سنووری کێشەیەکی ئاسایی لە نێوان هاندەران تێنەپەڕاندووە، بەڵکوو بووەتە هۆی پەلاماردانی پاسەکانی هاندەرانی یانەی هەولێر و برینداربوونی ژمارەیەک لە هاندەرە خۆشەویستەکانمان، کە بە مەبەستی هاندان و پشتگیری لە یانەکەیان هاتبوونە بەغدا.
دەستەی کارگێریی یانەی هەولێر ئەم کردارە بە هیچ شێوەیەک قبوڵ ناکات و بە توندی ئیدانەی دەکات. تۆپی پێ وەرزشە و پێویستە هەموو کێبڕکێ و جیاوازییەکان لە ناو چوارچێوەی یاسا و گیانی وەرزشی بمێننەوە. جیاوازیی رەنگ، یانە و هاندەر نابێتە هۆی ئەوەی ژیانی کەسانێک بخەینە مەترسییەوە.
ئێمە لە یانەی هەولێر پشتیوانی تەواوی خۆمان بۆ هاندەرانی خۆشەویستی یانەکەمان دەردەبڕین و بە تایبەتی سەرەخۆشی و دڵسۆزیی خۆمان بۆ ئەو کەسانە دەردەبڕین کە لەم رووداوەدا بریندار بوون، و هیوادارین بە زوویی چاکببنەوە.
لە هەمان کاتدا، داوا لە لایەنە پەیوەندیدارەکان، دەزگاکانی ئاسایش، دەستەی کارگێڕی یانەی وەرزشی شورتە و فیدراسیۆنی تۆپی پێی عێراق دەکەین بە شێوەیەکی جددی و بەرپرسانە ئەم رووداوە لێکۆڵینەوەی لەسەر بکرێت و هەموو ئەو کەسانەی بەشداربوون لە پەلاماردانی هاندەرانی یانەی هەولێر و زیانگەیاندن بە پاسەکانیان، بەپێی یاسا و رێوشوێنی پێویست مامەڵەیان لەگەڵ بکرێت.
هەروەها داوا دەکەین کە کامێرا و بەڵگە و ڤیدیۆکانی پەیوەندیدار بە ڕووداوەکە کۆبکرێنەوە و بە شێوەیەکی ورد پشکنین بکرێن، بۆ ئەوەی راستییەکان بە تەواوی بۆ خەڵک و لایەنە پەیوەندیدارەکان روون بکرێنەوە و مافی هاندەرانی یانەکەمان بپارێزرێت.
لە کۆتاییدا، یانەی هەولێر داوا لە هەموو لایەنە پەیوەندیدارەکان دەکات بە بەرپرسیارییەوە لەگەڵ ئەم بابەتە مامەڵە بکەن و رێگە نەدرێت دووبارە رووداوێکی لەم شێوەیە رووبداتەوە.
|