لە ڕەمەزاندا، نەخۆشیی دەروونی و دڵەڕاوكێ لەسەدا 50 كەم دەبێتەوە
2025-03-21
220 جار خوێنراوەتەوە
دكتۆر ئەفرام محەمەد پسپۆڕی نەخۆشییە دەروونییەکان باس لە كەمبوونەوەی ئەو نەخۆشییە دەكات لە مانگی رەمەزاندا، لەوبارەیەشەوە بۆ كوردستانی نوێ وتی: ئەو كەسانەی لە مانگی رەمەزاندا بەڕۆژوو دەبن، جیاواز لە مانگەكانی دیكەی ساڵ بەڕێژەی لە 50 % كەمتر تووشی خەمۆكی و دڵەڕاوكێ دەبن.
هەروەها ئاماژە بە چەند خاڵێك دەكات كە ئەمانەن:
-هەركەسێك بڕیاری بەڕۆژوبوون بدات، جۆرێك لە ئازایەتی و خۆڕاگریی تێدایە، كە بەسەر برسێتی و تینوێتیدا زاڵبێت و وەک باوەڕێکی ئایینیش جۆرێک ئارامیی بەکەسەکە دەبەخشێت و هەڵچوونی دەروونیی كەم دەكاتەوە.
-خەمۆكی بە یەكێك لە نەخۆشییەكانی سەردەم دادەنرێت. جۆرێك نەخۆشیی دەروونی هەیە لە سەرەتای بەیانیاندایە، جۆرێكی دیكەی هەیە نیشانەكانی لە پاشنیوەڕواندا دەردەکەوێت کە نیشانەكانی لە جۆری یەكەم خراپترە، بەجۆرێک ئەگەری خۆكوژی و نەبوونی كەسێك لەو كاتەدا و نەبوونی پەیوەندیی كۆمەڵایەتی هۆكارێکی دیکەیە بۆئەوەی خۆكوژی رووبدات، بەڵام لەو كاتەی كەسەكە بەڕۆژوو دەبێت و هەندێك پەیوەندیی ئیمانی دەبێت، ئەگەر زیان بەخۆگەیاندن تێیدا كەمدەبێتەوە.
لەگەڵ ئەوەشدا پەیوەندیی خێزان لەكاتی پارشێو و بەربانگدا كاریگەریی گەورەی هەیە، ئەمەش وا لە ئەندامانی خێزان دەكات زیاتر ئاگاداری دۆخی یەكتری بن و هەوڵی چارەسەركردنی گرفتەكانی یەکتری بدەن.
-دڵەڕاوكێ یەكێكی دیكەیە لە نەخۆشییە دەروونییە باوەكانی ئێستا، لەكاتی بە رۆژوبووندا ئەگەری كەمبوونەوەی ئەو حاڵەتە بۆ رێژەی 50 % كەم دەبێتەوە، چونكە كەسەكە دەروونی ئارام و هێمنترە بەهۆی ئەوەی رۆژووەوان هەوڵدەدات بیر لە كێشە و گرفتەكان نەكاتەوە و زیاتر لە كەشێكی ئیمانی و خواپەرستیدا كاتەكانی بەسەربەرێت.
-مانگی رەمەزان بە هەلێكی گەورە دادەنرێت بۆ ئەوانەی بەكاربەر و ئالودەی ماددەی هۆشبەر و خواردنەوە کهولییەکانن بۆئەوەی وازبهێنن لەم مانگەدا، بەكارهێنانی هەموو ماددە هۆشبەرەكان و ماددە کهولییەکان كەم دەبێتەوە.
بەپێی هەندێك توێژنەوە و ئاماریش بە رێژەی نیوە زیاتر فرۆشتنی ماددە کهولییەکان كەمدەبێتەوە. هەندێک کەسیش ئەم مانگە دەكەنە سەرەتایەك بۆ وازهێنان لە خواردنەوە کهولییەکان.
|