لە غەززە چی روو دەدات، بۆچی هەمووان بێدەنگییان هەڵبژاردووە؟
21 کاتژمێر پێش ئێستا
444 جار خوێنراوەتەوە
بۆردوومانەکانی سوپای ئیسرائیل بۆ سەر کەرتی غەززە بەردەوامن و سەدان ژن و منداڵی دیکە بوونەتە قوربانی، وڵاتانی عەرەبی و ئیسلامیش تەنیا تەماشاکاری دۆخەکەن.
دوای شکستهێنانی ئاگربەستی نێوان بزووتنەوەی حەماس و ئیسرائیل، هێرشە ئاسمانییەکان بۆ سەر کەرتی غەززە بە چڕی دەستیان پێ کردووەتەوە.
رۆژانە سەدان بۆمب بەسەر ناوچە وێرانبووەکانی کەرتەکەدا دادەبارن، دانیشتوانەکەی هیچ پەناگەیەک نیە پەنای بۆ ببەن، بە هەر لایەکدا بڕۆن بۆمبەکان ئاڕاستەیان دەکرێت.
رێخکراوی مانگی سوری نێودەوڵەتی بڵاویکردووەتەوە هیچ شوێنێکی غەززە بۆ دانیشتوانەکەی پارێزراو نیە تا پەنای بۆ بەرن.
ناتەنیاهۆ سەرۆک وەزیرانی ئیسرائیل کە دەستی بە خوێنی زیاتر لە پەنجا هەزار دانیشتووی غەززە سور بووە دەڵێت غەززە پارچە پارچە دەکەین تا تەواوی بارمتەکان ئازاد دەکەین.
ئەم وتەیەی سەرۆک وەزیرانی ئیسرائیل لە کاتێکدایە حەماس ئامادەیی خۆی بۆ بەردەوامبوونی ئاگربەستەکە نیشاندابوو.
بە بڕوای چاودێران، ئامانجی ئیسرائیل لە شکست پێهێنانی ئاگربەستەکە تەنیا پرسی بارمتەکان نیە بەڵکو ئامانجی دیکەی لە پشتەوەیە.
لەوانە، ناچار کردنی دانیشتوانی غەززە بە چۆڵکردنی شوێنەکانیان و گواستنەوەیان بۆ وڵاتی سێهەم، تێوەگلانی ئەمریکا لە رووبەڕووبوونەوەی راستەوخۆی لەگەڵ حەماس و خۆ دزینەوەی ناتەنیاهۆ لە پرسی دادگاییکردنی لە سەر دۆسیەی گەندەڵی.
بە تەنیا لە بۆردوومانەکانی ڕۆژانەدا لایەنه کەم 30 هاووڵاتی غەززە شەهید دەبن بەوەش ژمارەی شەهیدەکان تا ئێستا ٥٥ هەزار کەسی تێپەڕاندووە کە زۆرینەیان ژن و منداڵانن.
لەلایەکی دیکەوە، حەماس دیمەنی بەشێک لە بارمتەکراوەکانی بڵاوکردەوە کە تێیدا داوا لە ناتەنیاهۆ دەکەن بگەڕێتەوە سەر مێزی گفتوگۆ و ئاگر بەست رابگەیەنێتەوە.
کەسوکاری بارمتەکانیش فشارەکانیان بۆ سەر حکوومەتی ئیسرائیل زیاتر کردووە و رۆژانە خۆپیشاندانی فراوان لە دژی ناتەنیاهۆ رێک دەخەن.
بەشێک لەو بارمتە ئیسرائیلیانەی لەلایەن حەماسن بەهۆی بۆردوومانەکانی ئیسرائیلەوە لەناو تونێلەکاندا کوژراون.
بزووتنەوەی حەماس پێشتر بڵاویکردەوە ئەو ناوچانەی سوپای ئیسرائیل دەیانکاتە ئامانج مەترسی جددی لەسەر گیانی بارمتەکان دروستکردووە.
هەرچی وڵاتانی عەرەبی و ئیسلامییە، تەنیا تەماشاکاری دۆخەکەن هیچ هەڵوێستێکیان بەرانبەر بەو قەتڵ و عامە نیە کە بەرانبەر خەڵکی بێ دیفاعی غەززە ئەنجام دەدرێت.
|