تۆڕێکى نێودەوڵەتى مادەى هۆشبەر دەستگیر کران
2025-04-08
240 جار خوێنراوەتەوە
تۆڕێکى 7 کەسى نێودەوڵەتیى بازرگانیی ماددەى هۆشبەر لە عێراق دەستگیرکران، بە گوێرەى بەڕێوەبەرایەتیى ماددە هۆشبەرەکان و کارتێکەرە دەروونییەکان، چالاکییەکانیان گەیشتووەتە سلێمانى و هەولێرى پایتەختى هەرێمى کوردستانیش.
بە گوێرەى راگەیێندراوێکی بەڕێوەبەرایەتیى مادە هۆشبەرەکان و کارتێکەرە دەروونییەکانى عێراق، ئەندامانى ئەو تۆڕە حەوت بازرگان بوون، بە فەرمانى دادگەى لێکۆڵینەوەى رەسافەى بەغدا دەستگیرکراون و چالاکیەکانیان لە بەغدا، سەلاحەدین، کەرکووک، نەینەوا، سلێمانى و هەولێر بووە.
بەڕێوەبەرایەتییەکە رایگەیاندووە، ئەو تۆڕە 90 هەزار دەنک حەبى هۆشبەرى کێپتاگۆن و ئامێرى تایبەتیان پێگیراوە کە بەکاردەهێنرێت بۆ ئامادەکردنى کەرەستەى سەرەتایی دروستکردنى مادەى هۆشبەرى کریستاڵ.
بەگوێرەى ئامارەکانى وەزارەتى ناوخۆى عێراق لە دوو مانگی سەرەتای ئەم ساڵدا دەست بەسەر نزیکەی دوو تۆن مادەی هۆشبەردا گیراوە. هەروەها نزیکەی دوو هەزار تۆمەتباری بەکارهێنان و بازرگانی بەو مادانە دەستگیرکراون.
|