سه‌رۆكایه‌تی هه‌رێم: ڕێگه به تێكدانی كولتوری پێكه‌وه‌ژیان ناده‌ین
22 کاتژمێر پێش ئێستا
256 جار خوێنراوەتەوە
سه‌رۆكایه‌تیی هه‌رێمی كوردستان رایگه‌یاند، له‌نزیكه‌وه به‌دواداچون بۆ هێرشه تاوانكاریه‌كه‌ی دوێنێی دهۆك ده‌كه‌ن كه جه‌ژنگێڕانی ئه‌كیتۆ له هاوڵاتییانی مه‌سیحیمان تیایدا به ئامانج گیران و ده‌شڵێت، "به هیچ شێوه‌یه‌ك ڕێگه به تێكدانی كولتوری پێكه‌وه‌ژیان و یه‌كترقبوڵكردن و لێبورده‌یی نادرێت".
سه‌رۆكایه‌تی هه‌رێم له‌ڕاگه‌یه‌ندراوێكدا بڵاویكرده‌وه، له نزیكه‌وه له‌گه‌ڵ ده‌زگا په‌یوه‌ندیداره‌كانی هه‌رێمی كوردستاندا به‌دواداچون بۆ ئه‌و هێرشه تاوانكارییه ده‌كات كه دوێنێ له ڕوداوێكی نامۆدا له دهۆك، كۆمه‌ڵێك له جه‌ژنگێڕانی ئه‌كیتۆ له هاوڵاتییانی مه‌سیحیمان تیایدا به ئامانج گیران و بوه هۆی برینداربونی دو كه‌س.
ئاماژه‌ی به‌وه‌شكردوه، "له كاتێكدا به توندی ئه‌و تاوانه سه‌ركۆنه ده‌كه‌ین، هه‌مو كوردستانییان دڵنیا ده‌كه‌ینه‌وه كه هه‌رێمی كوردستان وه‌ك هه‌میشه به نیشتمانی پێكه‌وه‌ژیان و ئارامی و سه‌قامگیری بۆ هه‌مو پێكهاته‌كانی ده‌مێنێته‌وه و به هیچ شێوه‌یه‌ك ڕێگه به تێكدانی كولتوری پێكه‌وه‌ژیان و یه‌كترقبوڵكردن و لێبورده‌یی نادرێت، تاوانكاریش به سزای یاساییی خۆی ده‌گات".
ئەنجومەنی ئاسایشی هەرێمی کوردستان له ڕاگه‌یه‌ندراوێكدا باسی له‌وه‌كردوه، "لە ڕۆژی 1ی 4ی 2025، لە کاتێکدا کە خەڵکی پارێزگای دهۆک لە ڕێوڕەسمەکانی جەژنی ڕەمەزان و جەژنی ئەکیتۆ بون، کەسێکی هەڵگری بیروباوەڕی تیرۆریستیی سەر بە داعش بە ئامێرێکی تیژەوە لە ناوبازاڕ هێرشی کردە سەر هاوڵاتییان و دو کەسی بریندارکرد".
|