کوردێک بە وێنەگرتنی کۆڵبەر، خەڵاتێكی جیهانی بەدەستهێنا

ئیبراهیم عەلی پوور ڕایگەیاند، بەهۆی وێنەگرتنی کۆڵبەرانی کورد لەسەر ئاستی جیهان خەڵاتی” وۆڵد پرێس فۆتۆ” پێی بەخشرا، دەشڵێت، لە ڕێگەی وێنەکانەوە گرنگی بە کار و ژیانی کۆڵبەران لە ڕۆژهەڵاتی کوردستان داوە.

ئیبراهیم عەلی پوور وێنەگری کوردی ڕۆژهەڵاتی کوردستان لە پێگەی فەرمی خۆی لە تۆڕی کۆمەڵایەتی ئینستاگرام لەبارەی بەدەستهێنانی خەڵاتێكی جیهانی پەیامێکی بڵاوکردەوە.

ئیبراهیم عەلی پوور ڕایگەیاند، بەهۆی وێنەگرتنی کۆڵبەرانی کورد لەسەر ئاستی جیهان لە شاری ئەمستەردام لە پایتەختی هۆڵەندا خەڵاتی” وۆڵد پرێس فۆتۆ”ـی لە بەشی پرۆژە درێژمەوداكان پێی بەخشرا.

ئاماژەی بەوەشکرد، ژمارەیەک لە وێنەکانم بە ناونیشانی” گولەکان سنووریان نییە” ، کە گرنگی بە کار و ژیانی کۆڵبەران لە ڕۆژهەڵاتی کوردستان دەدات نمایش کراوە.

هاوکات، کارەکانی ئیبراهیم عەلی پوور جەخت لەسەر گێڕانەوەی چیرۆک لە ڕێگەی وێنەگری و دۆزینەوەی کێشە کۆمەڵایەتی و سیاسییەکان لە بارودۆخێکی سەختدا دەکات، هەروەها وێنەگری وەک ناوەندێکی بەهێز دەبینێت بۆ سەرنجڕاکێشانی بینەر، بەتایبەتی لە ناوچەکانی وەک ڕۆژهەڵاتی کوردستان و ئێران، کە سنووردارکردنی حکومەت و سانسۆر ئاڵنگارییەکی گەورە درووست دەکات. سەرەڕای ئەو سنوورداریانە، هەوڵ دەدات پەیوەندی لەگەڵ خەڵک درووست بکات و ئیلهام بەخش بێت بۆ گۆڕانکاری لە ڕێگەی کارەکانی.

جێگای ئاماژەیە، ئیبراهیم عەلی پووری تەمەن ٣٥ ساڵ خەڵکی شاری بانەی ڕۆژهەڵاتی کوردستانە و وێنەگری بەڵگەفیلمە. هەروەها خەڵاتی “وۆڵد پرێس فۆتۆ” یەکێک لە خەڵاتەکانی وێنەگرتنە لە جیهاندا، کە گرنگی بە پرسەکانی کۆمەڵایەتی، سیاسیی و مرۆیی دەدات.