قەباری ئاڵوگۆڕی بازرگانی نێوان عیراق و ئەمریکا بەرزبوەتەوە

قەبارەی  ئاڵوگۆڕی بازرگانی لەنێوان عیراق و ویلایەتە یەکگرتووەکانی ئەمریکا لەماوەی دوو ساڵی رابردوو بۆ دوو هێندە و زیاتر بەرزبوەتەوەو هاوکات هاوکارییە بازرگانییەکان بۆ بوارەکانی وەبەرهێنان و بازرگانی و ئابوری و چەند بوارێکی تر بەردەوام دەبێت.

بەپێی ئامارەکان هەناردەی عیراق بۆ ئەمریکا زیاتر لە 110% زیادی کردووە، هاوردەی عیراقیش لە ئەمریکاوە لە ماوەی دوو ساڵی ڕابردوودا لەنێوان 9 بۆ 10 ملیار دۆلار بووە، بەو پێیەش تەرازووی بازرگانی لەبەرژەوەندی عیراقە بەبڕی 5.7 ملیار دۆلار.

هاوکات هەناردەی نەوتی عیراقی بۆ ولایەتە یەکگرتووەکان بە 10 ملیار دۆلاری ساڵانە مەزەندە دەکرێت و ولایەتە یەکگرتوەکانی ئەمریکا بە شەشەمین هاوبەشی بازرگانی عیراق دادەنرێت لەدوای ئیماراتی عەرەبی یەکگرتوو، چین و تورکیا و ئێران و هیندستان.

سەبارەت بە قەبارەی هاوردەکردن، بەهای هاوردەکردنی مەکینە و کەرەستە و وێستگەکانی کارەبای کارەبا ساڵانە بە نزیکەی 260 ملیۆن دۆلار مەزەندە دەکرێت، بەو پێیەی هاوردەکردنی عیراق لە ئۆتۆمبێل و کەرەستەی گواستنەوە و ئەندازیاری و کەرەستەی کارەبایی خۆی دەبینێتەوە.

بەرزترین بەهای قەبارەی ئاڵوگۆڕی بازرگانی نێوان ویلایەتە یەکگرتووەکانی ئەمریکا و عیراق لەساڵی 2008دا بوو، ئەو کاتە بەهای ئاڵوگۆڕی بازرگانی نێوان هەردوو وڵات گەیشتە 24 ملیار دۆلار، هەروەها قەبارەی ئاڵوگۆڕەکەش لەگەڵ کەمبوونەوەی بڕی نەوتی هەناردەکراو بۆ ویلایەتە یەکگرتووەکانی ئەمریکا دابەزیوە.