سری سورەییا ئۆندەر کۆچی دواییکرد

سری سورەییا ئۆندەر، بریکاری سەرۆکی پەرلەمانی تورکیا و پەرلەمانتاری دەم پارتی کە هاوکات شاندی دەم پارتی بوو بۆ دیدارەکانی ئیمرالی، کۆچی دوایی کرد.
 
دوای 18 رۆژ مانەوەی لە نەخۆشخانەیەکی ئیستەنبووڵ، سری سورەییا ئۆندەر کاژێر 4.10ـی ئێوارەی ئەمڕۆ شەممە 3-5-2025 کۆچی دوایی کرد و نەخۆشخانەکەش لە راگەیێندراوێکدا ئەوەی پشتڕاستکردەوە.
 
نەخۆشخانەکە لە راگەیێندراوەکەدا دەڵێت، ئۆندەر بەهۆی لاوازبوون و لەکارکەوتنی بەشێک لە ئەندامەکانی جەستەی، بەرگری نەما و گیانی سپارد.
 
سری سورەییا ئۆندەر، شەوی سێشەممە 15ـی نیسانی 2025 تەندروستیی تێکچوو، دواتر دەرکەوت تووشی پچڕانی شاخوێنبەری دڵی بووە. 
 
ئەو کات پزیشکان رایانگەیاند، بەهۆی بەرزبوونەوەی پەستانی خوێنەوە شاخوێنبەری دڵی پچڕاوە و پاشانیش جەڵتە لێی داوە.
 
هەر لە سەرەتاوە دەیانوت: "وەڵامدانەوەی نەخۆشەکەمان بۆ چارەسەرییەکان کەمە، ئاوسانی مێشکی بەردەوامە و مەترسییەکانی سەر ژیانی تادێت روو لە زیادبوونە".
 
 سری سورەییا ئۆندەر کێیە؟
 
- ساڵی 1962 لە پارێزگای سەمسووری باکووری کوردستان لە خێزانێکی تورکمان لەدایکبوو.
 
- لە کۆلێژی زانستە سیاسییەکان لە زانکۆی ئەنقەرە خوێندی و تاوەکو قۆناخی دوو بەردەوام بوو.
 
- وێڕای ئەوەی سیاسەتڤان بوو، کاری رۆژنامەڤانی، دەرهێنانی فیلم، سیناریۆنووسینیشی دەکرد؛ هاوکات لە چەندین فیلمیشدا وەک ئەکتەر رۆڵی بینیبوو.
 
- رۆڵی گرنگی لە پرۆسەی چارەسەریی 2013 - 2015 لە تورکیا هەبوو و ئەم ساڵیش سەرۆکی شاندی دەم پارتی بۆ دیدارەکانی ئیمراڵی بوو
 
- لە هەڵبژاردنی 2015ـی پەرلەمانیی تورکیادا لەسەر لیستی پارتی دیموکراسیی گەلان (هەدەپە) خۆی بەربژێر کرد و بووە پەرلەمانتاری پارتەکە لە بازنەی ئەنقەرە
 
- لە دوایین هەڵبژاردنـی 2023ـی پەرلەمانیی تورکیادا بووە پەرلەمانتاری دەم پارتی لە بازنەی ئیستەنبووڵ
 
 - بریکاری سەرۆکی پەرلەمانی تورکیا و بریکاری سەرۆکی فراکسیۆنی دەم پارتی بوو