لە چوار ساڵدا 21 كەس لە هەرێمی كوردستان بە هەورەبرووسکە گیانیان لەدەست داوە

ئامارە فەرمییەکان ئاشکرای دەکەن لە ماوەی نێوان ساڵانی 2023 تاوەکو 2026، بەهۆی هەورەبرووسکەوە 50 هاووڵاتی بوونەتە قوربانی کە 21ـیان گیانیان لەدەستداوە و 29 کەسیش بریندار بوون، هاوکات ژووری ئۆپەراسیۆن بۆ بەڕێوەبردنی قەیران و کارەسات کۆمەڵێک ڕێنمایی گرنگی خۆپاراستن ئاراستەی هاووڵاتییان دەکات.

بەپێی ئاماری فەرمی لەبارەی زیانە گیانییەکانی هەورەبرووسکە لە پارێزگا و ئیدارە سەربەخۆکانی هەرێمی کوردستان، زۆرترین قوربانی لە ساڵی 2026 تۆمار کراوە کە 11 كەس گیانیان لەدەست داوە و 17 كەسیش بریندار بوون، لە ساڵی 2024دا شەش کەس گیانیان لەدەست داوە و 10 کەس بریندار بوون، هەروەها لە ساڵی 2023دا سێ گیانلەدەستدان و دوو بریندار، و لە ساڵی 2025یشدا یەک حاڵەتی گیانلەدەستدان تۆمار کراوە.

لەسەر ئاستی پارێزگاکان و ناوچە جیاجیاکانی کوردستان ژمارەی قوربانیانی هەورە بروسکە بەم شێوەیە: 

پارێزگای هەولێر: بە 14 بریندار و سێ گیانلەدەستدان لە پلەی یەکەمدایە.

ئیدارەی سەربەخۆی سۆران: سێ گیانلەدەستدان و شەش بریندار.

پارێزگای سلێمانی: پێنج گیانلەدەستدان و سێ بریندار.

پارێزگای دهۆک: پێنج گیانلەدەستدان و سێ بریندار.

پارێزگای کەرکووک: سێ گیانلەدەستدان.

ئیدارەی گەرمیان: یەک حاڵەتی گیانلەدەستدان.

پارێزگای هەڵەبجە: هیچ حاڵەتێک تۆمار نەکراوە.

ژووری ئۆپەراسیۆن بۆ بەڕێوەبردنی قەیران و کارەسات لە ڕێنماییەکدا داوا لە هاووڵاتییان دەکات لە کاتی هەورەبرووسکەدا دەستبەجێ مۆبایلەکانیان دابخەن، لە شوێنی بەرز، ژێر درەخت، ستوونی کارەبا و تاوەرەکانی پەیوەندی دوور بکەونەوە. 

هەروەها جەخت کراوەتەوە هاووڵاتییان لە کێڵگە کشتوکاڵییەکان، شوێنە کراوەکان، کەناراو و ڕووبارەکان، و کەرەستە ئاسنین و کانزاییەکان دوور بکەونەوە و لە دەرەوەی ماڵ ئامێری کارەبایی بەکار نەهێنن، هاوکات ئامۆژگاریی شۆفێران دەکرێت لەناو ئۆتۆمبێلەکانیاندا بمێننەوە بەهۆی ئەوەی پەیکەری ئۆتۆمبێل تا ڕادەیەک دەیانپارێزێت، بەڵام پێویستە خێرایی کەم بکەنەوە و لە کاتی هەر حاڵەتێکی نەخوازراودا پەیوەندی بە لایەنە پەیوەندیدارەکانەوە بکەن.