مەزڵووم عەبدی بە فەرمی کرایە راوێژکار لە سەرۆکایەتی کۆماری سوریا
1 کاتژمێر پێش ئێستا
23 جار خوێنراوەتەوە
ئاژانسی فەرمیی هەواڵی سووریا (سانا) بڵاوی کردەوە، ئەحمەد شەرع، سەرۆککۆماری قۆناخی راگوزەری سووریا بە فەرمانێکی سەرۆکایەتی، مەزڵووم عەبدی، فەرماندەی پێشووی گشتیی هێزەکانی سووریای دیموکرات (هەسەدە)ی وەک راوێژکاری سەرۆکایەتیی کۆمار دەستنیشان کردووە.
وێنەی فەرمانە سەرۆکایەتییەکە لە لایەن ساناوە بڵاوکراوەتەوە کە بە ئاماژە کردن بە ناوی تەواوی مەزڵووم عەبدی، دەڵێت: "بەڕێز مستەفا خەلیل عەبدی، دەکرێتە راوێژکاری سەرۆکایەتیی کۆمار."
رۆژی سێشەممە، 25ی ئاب شاندێکی رۆژئاوای کوردستان بە مەبەستی کۆبوونەوە لەگەڵ بەرپرسانی باڵای سووریا چووە دیمەشق. لەو کۆبوونەوەیەدا پێشنیازی پۆست بۆ مەزڵووم عەبدی و ئیلهام ئەحمەد، هاوسەرۆکی پێشووی پەیوەندییەکانی دەرەوەی بەڕێوەبەرایەتیی خۆسەر کرابوو.
|