مالیکی: هێرشی سەر ماڵی مەسعود بارزانی و نێچیرڤان بارزانی بۆ ئاژاوە نانەوەیە
3 کاتژمێر پێش ئێستا
30 جار خوێنراوەتەوە
سەرۆکی هاوپەیمانیی دەوڵەتی یاسا سەرکۆنەی هێرشکردنە سەر شوێنی نیشتەجێبوونی سەرکردەکانی هەرێمی کوردستان دەکات و هۆشداری لە نانەوەی ئاژاوە دەدات.
نووری مالیکی، سەرۆکی هاوپەیمانیی دەوڵەتی یاسا لە پۆستێکدا لە پلاتفۆرمی ئێکس رایگەیاند: "بە ئامانجگرتنی ماڵی هەریەک لە بەڕێزان مەسعود بارزانی و نێچیرڤان بارزانی کارێکی رەتکراوە و سەرکۆنەکراوە."
نووری مالیکی ئاماژەی بەوە کرد،ئەم جۆرە رەفتارانە تەنیا کەسایەتییەکان ناکەنە ئامانج، بەڵکو کاریگەرییان لەسەر ئاسایش و سەقامگیریی هەموو عێراق دەبێت؛هەروەها گوتی: "ئەم هێرشانە دەبنە هۆی لاوازکردنی یەکڕیزیی نیشتمانی."
دەقی پەیامەکەی نووری مالیکی:
"ئەو پێشێلکارییانەی لە هەرێمی کوردستان روویاندا، بە ئامانجگرتنی ماڵی سەرکردەکانی هەرێم، بەڕێزان مەسعود بارزانی و نێچیرڤان بارزانی، کارێکی رەتکراوە و سەرکۆنەکراوە لە لایەن هەر لایەنێکەوە بێت، ئەم کارانە تەنیا کەسانی دیاریکراو ناکەنە ئامانج، بەڵکو دەست بۆ ئاسایش و سەقامگیریی عێراق بە گشتی دەبەن و بەشدارن لە لاوازکردنی یەکڕیزیی نیشتمانی".
ئێمە ئەمڕۆ لە هەموو کات زیاتر پێویستمان بە بەهێزکردنی گیانی تەبایی و یەکگرتووییە لەنێوان رۆڵەکانی نیشتمان و رەتکردنەوەی تووندوتیژی بە هەموو جۆرەکانییەوە، و وەستان وەک یەک ریز بۆ شکستپێهێنانی هەوڵەکانی تێکدانی سەقامگیری و نانەوەی فیتنە لە نێوان پێکهاتەکانی گەلی عێراق."
|