دامەزراوەی پەی:پەرلەمان بە رێككەوتن كارادەكرێتەوە، نەك كڕینی پەرلەمانتاران

دامه‌زراوه‌ى په‌ى بۆ په‌روه‌رده‌ و گه‌شه‌پێدان ڕایگەیاند، هەوڵیك هەیە بۆ كاراكردنەوەی پەرلەمان نەك بە رێككەوتنی سیاسی، بەڵكو بەشێوەی ئیغراكردنی ماددی و كرینی ئیرادەیان. ئەوەش كارێكە دور لە مۆراڵی سیاسی، چونكە یەكەمیان پارە مولكی میللەتەو ناكرێت بەو شێوەیە مامەڵەی پێوە بكرێت.

هەروەها ڕەخنە لە لایەنەكانی ئۆپۆزسیۆن دەگرێت و دەڵیت، "دەیانتوانی لە یەكەم رۆژی دانیشتنەكەوە وادەی دانیشتنی تریان دەستنیشان بكردایەو و ساردنەبونایەتەوە، بەڵام لە چاوەڕوانی كۆبونەوە و رێككەوتنی یەكێتی و پارتیدا بون. ئێستاش كەوتۆتە بارودۆخێكەوە بە پاشكۆ ئەژمار دەكرێن".

دامه‌زراوه‌ى په‌ى لە ڕاگەیەندراوێكدا کە وێنەیەکی بۆ ٧ڕۆژ ناردووە لە ژێر ناوی "پەرلەمان بە رێككەوتن و لێبوردەیی كارادەكرێتەوە، نەك كڕینی ئیرادەی پەرلەمانتاران" بڵاویكردەوە، بە فەرمی و نافەرمی گوێ بیستی هەندێك لێدوان دەبین گوایە هەوڵێكی سیاسی هەیە بۆ رێككەوتنی هەندێ هێزی سیاسی لەگەڵ هەندێك لە ئەندامانی هێزەكانی تر لەدەرەوەی خواستی فراكسیۆنەكانیان، نەك بە رێككەوتنی سیاسی، بەڵكو بەشێوەی ئیغراكردنی ماددی و كرینی ئیرادەیان. ئەمەش كارێكە دور لە مۆراڵی سیاسی، چونكە یەكەمیان پارە مولكی میللەتەو ناكرێت بەو شێوەیە مامەڵەی پێوە بكرێت.

ئاماژەی بەوەشكرد، پەرلەمانتار نوێنەری خۆی نیە، نوێنەری ئەو خەڵكەیە كە دەنگیان پێی داوە و تەعبیر لە ئیرادەی پەرلەمانی دەكات و لێپرسراوە لە شكۆی پەرلەمان و دیموكراتیەت و ئیرادەی دەنگدەر، لەسەر ئەو بنەمایانە ناكرێت پەرلەمانتار لەپێناو بەرژەوەندی كەسیی خۆی و  داخوازیی حزبێكی ترەوە بگلێتە سەفقەی رێككەوتنێكەوە، كە تیایدا خۆی بفرۆشێت و بەشداریی یارییەكی سیاسیی قێزەون بكات كە ئەنجامەكەی شڵەژانی سیاسیی زیاتری هەرێمی لێبكەوێتەوە.

دامەزراوەكە هۆشداری لەو دۆخە دەدات و دەڵیت، "پێویستە هەم ئەو لایەنەی هەوڵدەدات بۆ كڕینیان ئیدانە بكرێت، هەم ئەو پەرلەمانتارانەش كە بەم شێوازە بچنە ئەو بەرەیەوە پێویستە روی راستەقینەیان بۆ كۆمەڵگە بخرێتە رو و لەلایەن دەنگدەرانیانەوە لێپێچینەوەیان لەگەڵدا بكرێت. ئاساییە هەركام لە لایەنە سیاسییەكان رێككەوتن بكەن بۆ پێكهێنانی حكومەت لەگەڵ یەكتری، بەڵام كرین و فرۆشتنی پەرلەمانتار و ئیرادەی پەرلەمانتار كارێكی نەشیاو و نەكردەیە".

دامه‌زراوه‌ى په‌ى ڕەخنە لە لایەنەكانی ئۆپۆزسیۆن دەگرێت و دەڵێت، "ئەم هێزە ئۆپۆزسیۆنانە لەسەرەتادا دەیانتوانی ببنە هێزی فشاری كاریگەر لەسەر یەكێتی و پارتی، بەتایبەتی كە (سەرۆكی تەمەن)ی پەرلەمانیش ئەندامی یەكێك لە هێزە ئۆپۆزسیۆنەكان بو، دەیانتوانی لە یەكەم رۆژی دانیشتنەكەوە وادەی دانیشتنی تریان دەستنیشان بكردایەو و ساردنەبونایەتەوە، چونكە ئەوەی گرنگە ئەوان دەیانەوێت پەرلەمان دروست بێت". 

باسی لەوەشكردوە، "هێزە ئۆپۆزسیۆنەكان هیچ هەنگاوێكیان نەنا، بەڵكو هەر لە چاوەڕوانی كۆبونەوە و رێككەوتنی یەكێتی و پارتیدا بون. ئێستاش كەوتۆتە بارودۆخێكەوە كە یەكێتی و پارتی هەركامێكیان بچنە كۆبونەوەوە ئەوان بە پاشكۆ ئەژمار دەكرێن، لەكاتێكدا دەیانتوانی هێزی فشاری كاریگەر بن، وەك ئەوەی لەسەردەمی شەڕی ناوخۆدا (58) پەرلەمانتاری خولی یەكەم لەناو پەرلەماندا مانیان گرت".

ئەوە لەكاتێكدایە ڕۆژانی 18 و 20ـی (تشرینی یەكەم/10)ـی 2024، هەڵبژاردنی خولی شەشەمی پەرلەمانی کوردستان بەڕێوەچو کە لەلایەن کۆمیسیۆنی باڵای سەربەخۆی ھەڵبژاردنەکان سەرپەرشتی کرا. لە 21ـی هەمان مانگ، کۆمسیۆنی باڵای سەربەخۆی هەڵبژاردنەکانی ئامارە بەراییەکانی ڕاگەیاند. دو ملیۆن و 899 هەزار و 578 کەس مافی دەنگدانیان هەبوە و لەو ژمارەیەش، دو ملیۆن و 87 هەزار و 972 کەس دەنگیانداوە، بەوەش ڕێژەی بەشداری لە هەڵبژاردن 72% بوە.