سێیەمین فێستیڤاڵی نێودەوڵەتیی فیلمی ئامەد بەڕێوەدەچێت

سێیەمین فێستیڤاڵی نێودەوڵەتیی فیلمی ئامەد، لە رۆژانی 7 بۆ 14ـی کانوونی یەکەم بەڕێوەدەچێت، تێیدا 84 فیلم بەشدارن.
 
فێستیڤاڵەکە بە میوانداریی شارەوانیی گەورەی ئامەد و بە رێکخستنی ئەکادیمیای سینەمای رۆژهەڵاتی ناوەڕاست و سینەبیر ساز دەکرێت.
 
فێستیڤاڵەکە ئەمساڵ بە درووشمی (جیهان بە چیرۆکەکان یەکدەگرێتەوە) لە رۆژانی 7 بۆ 14ـی کانوونی یەکەمی 2025 بەڕێوەدەچێت.
 
جگە لە پێشاندانی فیلم، چەندین چالاکیی جیاواز، لەوانە ماستەرکڵاس، وۆرکشۆپ و پانێڵی گفتوگۆ بە بەشداریی دەرهێنەران و ستافی فیلمەکان رێک دەخرێن. لە فێستیڤاڵەکەدا کۆمەڵێک فیلمی هەڵبژێردراوی ناوخۆیی و نێودەوڵەتی پێشان دەدرێن.
 
بە مەبەستی پشتگیریکردن لە سیناریۆی فیلمی کوردی، 15 سیناریۆ بۆ سندوقی پڕۆژەی سینەبیر دەکەونە کێبڕکێوە.
 
ئەو فیلمە بڵند، بەڵگەفیلم و کورتەفیلمانەی لە هەشت ساڵی رابردوودا لە سینەمای کوردی دا بەرهەمهاتوون، لە فێستیڤاڵەکەدا جێگەیان دەبێتەوە. لەم بەشەدا هاوکات ئەو فیلمە کوردییانەش نمایش دەکرێن کە پێشتر لە فێستیڤاڵە جیاوازەکاندا بەشدارییان کردووە.
 
لەژێر ناوی (گەشتی سینەمای کوردی)، 16 فیلمی درێژ، حەوت بەڵگەفیلم و 13 کورتەفیلم کێبڕکێ دەکەن.
 
هەروەها بەشێک بۆ فیلمە بیانییەکان تەرخانکراوە، تێیدا فیلمە سەرکەوتووەکانی سینەمای تورکیا و جیهان نمایش دەکرێن، کە پێکهاتوون لە 10 فیلمی درێژ، 11 بەڵگەفیلم و 14 کورتەفیلم.
 
کازم ئۆز، دەرهێنەری باکووری کوردستان، بە ناونیشانی "دەرهێنان لە سینەمادا" و تورەج ئەسڵانی، وێنەگر و دەرهێنەری رۆژهەڵاتی کوردستان بە ناونیشانی "جیاوازیی نێوان روانین و بینین" دوو ماستەرکڵاس بەڕێوە دەبەن.
 
بۆ پەرەپێدانی سینەمای کوردی و هاندانی نووسینی سیناریۆ؛ پێنج فیلمی درێژ، پێنج بەڵگەفیلم و پێنج کورتەفیلم کە بۆ سندوقی پڕۆژەی سینەبیر هەڵبژێردراون، دەچنە کێبڕکێیەوە و لە کۆتایی فێستیڤاڵەکەدا لە هەر بەشێک پڕۆژەیەک خەڵات دەکرێت.
 
فێستیڤاڵەکە بە کردنەوەی پێشانگەی (لە رێگە) دەستپێدەکات، کە تایبەتە بە ئەزموونی فیلمی (رێ-Yol)ـی یڵماز گونەی، دەرهێنەری ناسراوی کورد و بەرهەمی چەندین هونەرمەندی گرنگی تێدا نمایش دەکرێن. 
 
بەڵگەفیلمی (کارداش تورکولەر)ـی چایان دەمیرێل و ئایشە چەتینباش، وەک فیلمی دەستپێکی فێستیڤاڵ پێشاندەدرێت.
 
فیلمەکان لە هۆڵی ناوەندی کۆنگرەی رۆشنبیری ئامەد، شانۆی شارەوانیی ئامەد و هۆڵە سینەماییەکانی جەیلان مۆڵ نمایش دەکرێن.
 
لە چوارچێوەی فێستیڤاڵەکەدا سێ وۆرکشۆپ بەڕێوەدەچن: یەکەمیان بەناونیشانی (سینەمای کوردی؛ کامێرای بێناوەندی جوگرافیای لێکدابڕاو) لەلایەن دەرهێنەر ئارین ئینان ئارسلان، دووەمیان بەناونیشانی (گێڕانەوەی چیرۆکی خۆمان بە زمانی خۆمان؛ سینەمای ژنان) لەلایەن هولیا ئوگور و سێیەمیان لەلایەن ئایشە چەتینباش بەناونیشانی (بەرهەمهێنانی بەڵگەفیلمی سەربەخۆ) پێشکێش دەکرێت.
 
هەر لە فێستیڤاڵەکەدا پانێڵێک بە ناونیشانی (فانۆن 100 ساڵە) بە بەشداریی دلاوەر زەراق، هاکان ئاراش و ئێزگی دومان بەڕێوەدەچێت.