لالیگا تۆمارکردنی دانی ئۆلمۆ و پاو ڤیکتۆر رەتدەکاتەوە

دەستەی لالیگا لە بڵاوکراوەیەکدا ئەمڕۆ چوارشەممە، بەفەرمی ئەو رێوشوێنە داراییەی رەتکردەوە کە بەهۆیەوە بارسێلۆنا هەریەکە لە دانی ئۆلمۆ و پاو ڤیکتۆری لە لیستی یانەکەدا بۆ نیوەی دووەمی وەرزی ئەمساڵ تۆماکردبوو.
 
بڵاوکراوەکەی لالیگا، پاش ئەوە هات کە دەستەکە پێداچوونەوەی بەزانیارییەکانی فرۆشتنی کورسییەکانی 'ڤی ئای پی' لە یاریگەی نوێی کامپ نو کرد.
 
لالیگا لە بڵاوکراوەکەیدا دەڵێ، "وەکئەوەی پێشتر راگەیێنرابوو، ئێمە دۆکۆمێنتە تایبەتەکانی پڕۆسەی فرۆشتنی کورسییەکانی ڤی ئای پی یاریگەی بارسێلۆنامان لە سێی یەکی ئەمساڵدا پێگەیشت، لەوێدا هاتووە کە تێبینەری نوێی دارایی بارسێلۆنا کە رۆژی 31ی دوانزە دەستی بەکارکردووە، دووپاتیدەکاتەوە کە پڕۆسەکە لە تۆمارە داراییەکانی یانەکەدا بەشێوەیەکی دروست تۆمارکراوە وەک داهاتی قازانج و زیانەکانی یانەکە بۆ وەرزی ئەمساڵ".
 
لالیگا دەڵێ، "ئەو دۆکۆمێنتانە پێویست و گرنگ بوون بۆ رازیبوون لەسەر تۆماری ژمێرەری یانەکە، چونکە بەبێ ئەو دۆکۆمێنتانە نەدەکرا تۆمارەکان پەسند بکرێن و بەوەش دەستەی لالیگا بنمیچی تێچووی تیپی یەکەمی یانەکەی لە سێی مانگی یەکی ئەمساڵدا بەرزکردەوە و بەوەش رێگەخۆشبوو بۆ یانەکە تاوەکو هەریەکە لە دانی ئۆلمۆ و پاو ڤیکتۆر لە لیستەکەیدا تۆمار بکات".
 
بڵاوکراوەکەی لالیگا زیاتر دەڵێت، "لە 14ی مانگی دوودا و لەسەر بنەمای ئەو زانیارییانەی دەستەی لالیگا کۆی کردبوونەوە، هەروەها بەپێی بڕگەی 64.4 لە یاسای وەرزش، بەپێویست و پەلەی زانی داوای راپۆرتی چاودێری تایبەت بە 'ئەنجوومەنی باڵای وەرزش' بکات کە ئەو ئەنجوومەنە سەربەخۆیانە ئامادەی کردووە و لەگەڵیدا هاوپێچی هەموو زانیارییە کۆکراوەکانی دەستەی لالیگای لەبارەی هەمان دۆسێوە یەکخست".
 
لالیگا دەڵێ، بارسێلۆنا بەپێی ماوەی دیاریکراو لەلایەن لالیگاوە، زانیارییە داراییەکانی خۆی بۆ نیوەی یەکەمی وەرزی 2024 - 2025 لە راپۆرتێکدا خستووەتە روو کە سێ کۆمپانیای جیاواز پێداچوونەوەیان بۆ کردووە و بەوەش بارسێلۆنا لەماوەی سێ مانگدا، لەلایەن سێ کۆمپانیای جیاوازەوە پێداچوونەوە بۆ راپۆرتە داراییەکەی کراوە.
 
لالیگا زیاتر دەڵێ، "لەو زانیارییە داراییانەدا، هیچ بڕە پارەیەک لە بەشی قازانج و زیان کە پەیوەندیی بەم پڕۆسەیەوە هەبێت تۆمارنەکراوە، ئەوەش پێچەوانەی ئەو راپۆرتەیە کە یانەکە و تێبینیکاری دارایی یانەکە پێشتر پشتڕاستی کردوونەتەوە".
 
دەستەکە هەروەها دەڵێ، "بەپشتبەستن بەوو زانیارییە داراییانەی یانەکە تۆماریکردوون لە راپۆرتی دارایی خۆیدا، یانەکە نە لە کۆتایی 2024 و نە لەسەرەتای 2025 و تەنانەت تاوەکو ئەمڕۆش، هیچ داهاتێک یان بڕە پارەیەکی تۆمارنەکردووە بۆ ئەو پڕۆسەیەی کە بە یاسای یاریی خاوێن ناسراوە لەپێناو تۆماکردنی هەریەکە لە دانی ئۆلمۆ و پاو ڤیکتۆر".
 
دەستەی لالیگا دەڵێ، دەستەکەمان یانەی بارسێلۆنای ئاگادارکردووەتەوە لەوەی کە بەهای تیپە وەرزشییەکەی بەهەمان بڕە پارە کەمبکاتەوە. هەروەها ئەنجوومەنی باڵای وەرزشمان ئاگادارکردووەتەوە لە ئەنجامەکانی یاسای یاریی خاوێن.
 
هەربۆیە وەک دەستەکە ئاماژەی پێداوە، "لەسایەی ئەم پێشهاتانەدا، دەستەی لالیگا رایدەگەیێنێت کە سکاڵا لە دژی تێبینەری یانەی بارسێلۆنا تۆماردەکات، چونکە ئەو پڕۆسەی تۆمارکردنەکەی پشتڕاستکردووەتەوە".
 
بەپێی وردەکارییە یاساییەکانی بڵاوکراوەکەی دەستەی لالیگا، ئەو دەستەیە جارێکی دیکە پەنا دەباتەوە بەر هەڵوەشاندنەوەی بڕیاری تایبەتی ئەنجوومەنی باڵای وەرزشی ئیسپانیا، کە رێگەی بەتۆمارکردنی دانی ئۆلمۆ و پاو ڤیکتۆر لە لیستی یانەکە بۆ نیوەی دووەمی وەرزی ئەمساڵ دابوو.
 
پێشبینیکراوە لە رۆژانی داهاتوودا لالیگا، بەفەرمی پڕۆسەی تۆمارکردنی ئەو دوو یاریزانە لە لیستی بارسێلۆنا رابگرێت.