دوای تەرککردنی جگەرە چی لە جەستە ڕوودەدات؟
1 کاتژمێر پێش ئێستا
22 جار خوێنراوەتەوە
ڕۆژنامەی وۆڵ ستریت جۆرناڵ لە ڕاپۆرتێکی پزیشکیدا ئاشکرای دەکات هەرچەندە وازهێنان لە جگەرەکێشان لە هەر قۆناغێکدا بێت سوودی گەورەی هەیە، بەڵام هەندێک لە زیانەکانی سەرسییەکان و مەترسیی شێرپەنجە بۆ چەندین ساڵ و تەنانەت تا کۆتایی ژیانیش هەر دەمێننەوە.
توێژینەوە پزیشکییەکان ئاشکرایان کردووە، بەشێک لە شوێنەوارە ئەرێنییەکانی تەرککردنی جگەرە یەکسەر دەردەکەون؛ بۆ نموونە دوای 20 خولەک لێدانی دڵ ئاسایی دەبێتەوە و دوای چەند کاتژمێرێک ئاستی یەکەم ئۆکسیدی کاربۆن لە خوێندا دادەبەزێت. دوای چەند هەفتەیەکیش مووە وردەکانی ناو سییەکان دەست دەکەنەوە بە کارکردن بۆ پاککردنەوەی سییەکان، کە ئەمەش مەترسیی نەخۆشییەکانی دڵ و جەڵتە کەمدەکاتەوە.
پزیشکان هۆشداری دەدەن کە هەندێک زیان گەڕانەوەیان نییە؛ دووکەڵی جگەرە کیسە وردەکانی هەوای سەر سییەکان لەناودەبات کە بەرپرسن لە ئاڵوگۆڕی ئۆکسجین، ئەم کیسانەش هەرگیز دروست نابنەوە و دەبنە هۆی تەنگەنەفەسیی درێژخایەن. هەروەها تێکچوونی DNA خانەکانی سییەکان مەترسیی شێرپەنجە بە بەرزی دەهێڵێتەوە.
دکتۆر ئیریک سینگی، پسپۆڕی شێرپەنجە لە ئەمریکا دەڵێت: تەنانەت دوای دەیان ساڵ لە تەرککردنی جگەرەش، مەترسیی تووشبوون بە شێرپەنجەی سییەکان سێ تا چوار بەرامبەری کەسێکە کە هەرگیز جگەرەی نەکێشابێت.
پزیشکان ئامۆژگاری وازهێنەران دەکەن کە پەنا بۆ وەرزشی بەردەوام و خواردنی تەندروست (وەک سپێناخ، برۆکۆلی، ماسی و چای سەوز) بەرن، هەروەها دووربکەونەوە لە "ڤەیپ" چونکە زیانی بۆ سییەکان هەیە. بۆ ئەو کەسانەش کە بۆ ماوەیەکی درێژ جگەرەکێش بوون، پشکنینی ساڵانەی پێشوەختە بۆ شێرپەنجە بە زەروورەت دەبینرێت.
|