د. ڕێبوار کەریم لە کۆبوونەوەی هاوپەیمانی بەڕێوەبردنی دەوڵەت چی وت؟

سەرۆکی فراکسیۆنی هەڵوێست لە ئەنجومەنی نوێنەرانی عیراق دەڵێت بەشداربوم لە کۆبونەوەی هاوپەیمانی بەڕێوەبردنی دەوڵەت و داوام کردووە لەهیچ بارودۆخێکدا موچەی فەرمانبەران و موچەخۆرانی هەرێمی کوردستان نەکەوێتەژێر مەترسییەوە.

دقی نوسینەکەی د. ڕێبوار کەریم:

بەشداربوم لە کۆبونەوەی هاوپەیمانی بەڕێوەبردنی دەوڵەت

دوێنێ لە کۆشکی حکومی بەشداربوم لەکۆبونەوەی هاوپەیمانی بەڕێوەبردنی دەوڵەت کە تەرخانکرابو بۆ گفتوگۆ دەربارەی بارودۆخی سیاسی و پرۆژە یاسای بودجە. 
لەکۆبونەوەکەدا ئەم پێشنیارانەم خستەڕوو:

1. لەپشکی هەرێمی کوردستاندا بڕی بەرمیل بۆ فرۆشتنی نەوت دیاری نەکرێت و لەبری ئەوە بنوسرێت (کۆی نەوتی بەرهەمهێنراوی هەرێم لەڕێ سۆمۆوە بفرۆشرێت).

2. لەبەرامبەر کۆی نەوتەکە، بودجەی پێویست و سوتەمەنی پێویست بۆ خەڵکی هەرێم لە بەنزین و نەوتی سپی و گازوایل لەلایەن عیراقەوە دابین بکرێت.

3. بەزوترین کات رێکەوتن بکرێت لەسەر سیستەمی ئەسیکۆدا، کە جێبەجێنەکردنی بوەتەهۆی کێشەی گەورە وەک گرانی و دروستکردنی خاڵی گومرکی نایاسایی.

4. لەدامەزراندن و بەهەمیشەییکردن و پلەبەرزکردنەوەدا رەچاوی هەرێمی کوردستان بکرێت و رێژەی خۆی پێ بدرێت.

5. لەهیچ بارودۆخێکدا موچەی فەرمانبەران و موچەخۆرانی هەرێمی کوردستان نەکەوێتەژێر مەترسییەوە.

بڕیاردرا پێشنیارەکانم ببرێتەبەردەم گفتوگۆکانی ئەمرۆی وەفدی هەرێم کەدێتە بەغداو کۆبونەوە یەکلاکەرەوەکان دەکرێن. هیوادارم رێکبکەون.

د.رێبوار کریم
سەرۆکی فراکسیۆنی هەڵوێست
ئەنجومەنی نوێنەرانی عیراق