ڕاگەیاندن لەئاست ڕووداوەکاندا چیبکات

 بێگومان، تاک پێویستی بەوەیە ئاگای لەڕووداوەکانی چواردەوری خۆی بێت و زانیاری لەسەر ژینگەی چواردەوری وەربگرێت، کەئەمەش ئەرکی ڕاگەیاندنە ڕووداوەکان بگوازێتەوە، بەڵام وەک خۆی بیگوازێتەوە نە گەورەی بکات زیاد لەقەبارەی خۆی نە بچوک و فەرامۆشی بکات، هەروەها بەشێوەیەک نەبێت کەکاربکاتە سەر دەرونی تاک، ئەوەی لە ئێستادا زۆر مشتوومڕی لەسەرە ڕووداوەکانی تاوان و کوشتن و تووندوتیژییە، لە ئێستادا هاووڵاتی خۆی دەیان کێشەی هەیەو فشارێکی زۆری لەسەرە، کاتێکیش ڕووداوێکی ناخهەژێن ڕوودەدات ئەوەندەیتر کاردەکاتە سەر لایەنی دەروونی و بییەوێت یان نەیەوێت پێی کاریگەر دەبێت، خواهەڵناگرێت ڕاگەیاندنی کوردیش تائێستا بەوشێوەیە کاریکرددوە وبەشێکەلە تێکدانی باری دەروونی جەماوەرەکەی، ئەگینا قەت بووە لەکەسەنزیکەکانی مردوو بپرسیت هەستت چۆنە. یاخود ڕۆڵی دادگا ببینیت و حکوم بدەیت بەسەر بکوژدا، یاخود شیوەن و ڕۆڕۆی کەسی نزیکی مردوو یان کوژراو بگریت و سات بەسات ڕوماڵبکەیت و هەتا ساتی ناشتنی مردووەکە و خستنە ناو گۆڕەکەیەوە وێنەی بگریت، یاخود پەیامنێر بچێتەلای بکوژ چاوپێکەوتن لەگەڵ بکوژدا بکات کە هێشتا سەرەتای ڕووداوەکەیەو لایەنی پەیوەندیدار یەکلای نەکردۆتەوە، یاخود ووردەکاری چۆنێتی ئاەنجامدانی ڕوداوەکە بۆ بینەر بگێڕیتەوە و هەموو پێشینەی ژیانی خێزانەکان بۆ بینەر بخەیتەڕوو.

 دەزگاکانی ڕاگەیاندن دەتوانن بەشێوەیەک کارلەسەر کەمکردنەوەی تاوان و توندووتیژی بکەن، پێویست ناکات کاتێکی زۆری پەخشی دەزگاکان بۆ خستنەڕووی ڕووداوەکانی کوشتن و تاوان و توندوتیژی تەرخانبکرێت، لەجیاتی ئەوە گرنگی بدرێت بەهەڵمەتی هۆشیاری بۆ ئەنجامنەدانی توندووتیژی، خستنەڕووی شێوازو ڕێگای چارەسەر بۆ کێشەکان لەڕێگای پسپۆڕەکان و چارەسەرکردنی هەر کێشەیەکی دەروونی تاک پێش ئەوەی بگاتە ڕادەی ئەنجامدانی توندووتیژی و تاوان، هەڵمەتی ڕاگەیاندن بۆ خستنەڕووی بڕگەو ماددەکانی سزاکانی ئەنجامدانی تاوانەکان، و جەختکردن لەسەر نەهێشتنی چەک لەناوماڵدا بێ هۆکار، فشار لەسەر دەسەڵات و لایەنە پەیوەندیدارەکان دروستبکرێت بە کۆکردنەوەی چەک، کارکردنی پیشەییانەی پەیامنێران و دەزگاکان لە چۆنێتی ڕووماڵکردن و تەنانەت جۆری ئەوپرسیارانەی ئاراستەی لایەنە پەیوەندیدارەکان دەکرێت، پەلەنەکرێت لە بڕیاردان و خۆنەخەنە جێی دادگاو دادوەرو حوکوم بەسەر تۆمەتباردا نەدەن.