شارەوانی هەولێر: لافاوەکە زیانی گیانی و مادیی زۆری لێکەوتووەتەوە
16 خولەک پێش ئێستا
8 جار خوێنراوەتەوە
سەرۆکی شارەوانیی هەولێر دەڵێت بەهۆی لافاوەکەی ئەم دواییەی شارەکەوە زیانی گیانی و مادیی بەرچاو بەر ماڵی هاووڵاتییان و موڵکی گشتی کەوتووە، هاوکات تیمەکانیان سەرقاڵی پاککردنەوە و سەرژمێریکردنی سەرجەم زیانەکانن.
کارزان هادی، سەرۆکی شارەوانیی هەولێر ئاماژەی بەوە کرد، تەواوی کارمەندانی شارەوانی زیاتر لە 600 کارمەندە بەسەر ناوچە زیانلێکەوتووەکاندا دابەش کردووە بۆ پاککردنەوەی پاشماوەکانی لافاو و ئاوەڕۆکان.
سەرۆکی شارەوانیی هەولێر وتیشی بەداخەوە لافاوەکە زیانی گیانی هەبووە، هاوکات زیانێکی زۆری مادییش بەر ماڵی هاووڵاتییان و موڵکی گشتی کەوتووە، بەڵام تا ئێستا بەهۆی بەردەوامیی کارەکان، ئاماری ورد و کۆتایی زیانەکان بەردەست نییە.
سەبارەت بە زیانی ئۆتۆمبێلەکان، سەرۆکی شارەوانی رایگەیاند، ژمارەیەکی زۆر ئۆتۆمبێل زیانیان پێگەیشتووە و لە هەندێک شوێن، لەوانە 'نەفەقی رزگاری'، تا ئێستاش ئۆتۆمبێل لەژێر ئاودا ماونەتەوە،
جەختیشی کردەوە، تیمەکانیان لە هەوڵی بەردەوامدان تا تەواوی ئەو شوێنانە پاک بکەنەوە و ئاستەنگی هاتوچۆ نەهێڵن.
ئێوارەی دوێنێ شەممە، 7ـی تشرینی دووەمی 2026، لە ئەنجامی هاتنی شەپۆلێکی چڕ و پێشبینینەکراوی بارانبارین بۆ سەر هەرێمی کوردستان، کە چەقی قورساییەکەی لەسەر سەنتەری شاری هەولێر و دەوروبەری بوو، لە چەندین گەڕەک و شەقامی سەرەکیی شارەکە لافاو و پەنگخواردنەوەی ئاو دروست بوو.
بەرزبوونەوەی لەناکاوی ئاستی ئاو لە سنووری شارۆچکەی کەسنەزان و گەڕەکی هەولێری نوێ، بووە هۆی زیانگەیاندن بە دەیان ماڵ و ژێرئاوکەوتنی ژمارەیەک ئۆتۆمبێلی هاووڵاتییان، لە پاڵ دروستبوونی ئاستەنگییەکی قورسی هاتوچۆ لە زۆربەی جومگەکانی شارەکەدا.
|