پڕۆژەی هێڵی سێیەمی ئاوی دوکان سلێمانی واژۆ کرا

پڕۆژەی هێڵی سێیەمی ئاوی دووكان، سلێمانی ئیمزا کرا، کە ئەنجومەنی وەزیرانی هەرێم رەزامەندی لەبارەوە داوە، بەڕێوەبەری ئاوی سلێمانیش ئەوەی خستەروو: پڕۆژەکە بۆ ماوەی 30 ساڵی داهاتوو كێشەی كەمئاوی لە سلێمانی چارەسەر دەكات.

بەئامادەبونی قوباد تاڵەبانی جێگری سەرۆکوەزیران گرێبەستی پڕۆژەی هێڵی سێیەمی ئاوی دووكان – سلێمانی ئیمزا کرا کە زیاتر لە 423 ملیۆن دۆلاری بۆ تەرخان کراوە.

ساسان عەونی وەزیری شارەوانی و گەشت و گوزار لە کۆنگرەیەکی رۆژنامەوانیدا لەبارەی پرۆژەکەوە رایگەیاند: تەواوبونی ئەم پرۆژەیە کێشەیەکی لەمێژینەی ئاوی سلێمانی چارەسەردەکات، کە پرۆژەیەکی کابینەی 9یەو بۆ چارەسەرکردنی کێشەی کەم ئاوییە، کە دیراسەی لەسەرکراوەو کورتهێنان هەبووە لە پرۆژەی ئاو لە شاری سلێمانی.

وتیشی: ئەم پرۆژەیە گەورەو ستراتیژی و درێژمەودایە، پێکهاتەکانی رۆڵی گەورە لەچارەسەری کێشەی ئاوی سلێمانی و ناوچەکانی دەوروبەریشی دەبێت، بەدڵنیایەوە کوالیتی ئاوی بەرهەمهاتوو بەپێی ستانداردی عیراقی و جیهانی دەبێت.

هەر لەو بارەیەشەوە بەختیار تاهیر، بەڕێوەبەری ئاوی سلێمانی رایگەیاند: گرێبەستەکە بە گوژمەی 423 ملیۆن و 790 هەزار دۆلار ئیمزا کراوە، کە بۆ ماوەی 30 ساڵی داهاتوو كێشەی كەمئاوی لە سلێمانی چارەسەر دەكات و گرێبەستەکەش لە نێوان وەزارەتی شارەوانی و گەشتوگوزار و كۆمپانیای جێبەجێكار ئیمزا کرا.

ئاماژەی بەوەشدا: پڕۆژەکە بە هەوڵی قوباد تاڵەبانی، جێگری سەرۆک وەزیرانی هەرێم رەزامەندی ئەنجومەنی وەزیرانی بەدەستهێناوە و لەماوەیەکی نزیکدا دەخرێتە بواری جێبەجێکردنەوە، ئەمەش لەدوای ئەوەدێت پێشتر پڕۆژەکە تەنها 398 ملیۆن و 486 هەزار دۆلاری بۆ تەرخانکرابوو، بەڵام بەهەوڵی جێگری سەرۆکی ئەنجومەنی وەزیرانی هەرێم بڕیاری زیادکردنی گوژمەکە بۆ 423 ملیۆن و 890 هەزار دۆلار درا.