مۆرینیۆ سێ ئەستێرە لە ریال مەدرید دەردەکات

جۆزێ مۆرینیۆ، راهێنەری ریال مەدریدی ئیسپانی بڕیاری داوە پێش داخستنی دەرگای گواستنەوەی یاریزانان لیستەکەی کەم بکاتەوە، راهێنەرە پۆرتوگالییەکە سێ یاریزانی دیاریکردووە بۆ ئەوەی یانەکە جێبهێڵن، چونکە دەیەوێت تەنیا کار لەگەڵ 20 یاریزان بکات.

جۆزێ مۆرینیۆ خاوەنی لیستێکی 26 یاریزانییە، ئەمەش لە کاتێکدایە راهێنەرە پۆرتوگالییەکە دەیەوێت تەنیا پشت بە 20 یاریزان ببەستێت، لەگەڵ سێ یاریزانی دیکە کە پێکانی درێژخایەنیان هەیە، ئەوانیش ئیتان میلیتاو، رۆدریگۆ و فێرلان مێندین، بەمەش مۆرینیۆ سێ یاریزانی لە لیستەکەیدا زیادەیە.

راهێنەرەکە دوای یارییەکەی بوداپێست هەڵوێستی خۆی روونکردەوە و گوتی "من تیپێکی بچووکم دەوێت، پێکهاتبێت لە 20 یاریزان و یاریزانە پێکانەکان". دوای ئەوەی تیاگۆ پیتارچ بۆ تیپی یەکەم سەرخرا، ژمارەی یاریزانانی ریال مەدرید گەیشتە 26 یاریزان.

ریال مەدرید بڕی 225 ملیۆن یۆرۆی لە گواستنەوەی شەش یاریزان خەرجکردووە بۆ جێبەجێکردنی داواکارییەکانی راهێنەرەکە، یاریزانەکانیش بریتین لە دیۆماندێ، کوکۆریا، دومفریس، کۆناتی، بێرناردۆ سێلڤا و کارلۆس ئێسپای. بڕیاربوو رۆدری گرێبەستە گەورەکە بێت، بەڵام یاریزانەکەی مانچێستەر سیتی لە کاتێکی هەستیاردا یانەکەی جێهێشت و هیچ پلانێک نییە بۆ گواستنەوەی یاریزانێکی دیکە لە هێڵی ناوەڕاست.

گواستنەوەی بەرگریکارێکی چەقی نوێ بەندە بە رۆیشتنی راول ئاسێنسیۆ، ئەگەر یانەکە دەستەوارەیەکی باشی بۆ بێت و یاریزانەکەش رازیبێت، هەرچەندە ئەو یاریزانە بەردەوام دووپاتی دەکاتەوە دەیەوێت بمێنێتەوە.

سێ یاریزان لە دەرەوەی پلانەکانی مۆرینیۆن، بەڵام ئەو دەیەوێت پشت بەو یاریزانانە ببەستێت کە دەتوانن لە چەند شوێنێکی جیاواز یاری بکەن، وەک ئاردا گولەر و بێرناردۆ سێلڤا، هەردووکیان دەتوانن لە هێڵی هێرشبەری و ناوەڕاستیش یاریی بکەن.

ئەمە بۆ جود بێلینگهامیش راستە، راهێنەر پێی وایە هێشتنەوەی ئەو یاریزانانەی خولەکی کەم یاری دەکەن و هەلی یاریکردنیان نییە، دەبێتە هۆی دروستبوونی گرژی لە ژووری جلگۆڕین، ئەوەش شتێکە مۆرینیۆ دەیەوێت لێی دوور بکەوێتەوە.

ئێدواردۆ کاماڤینگا یەکێکی دیکەیە لەو یاریزانانەی ریال مەدرید دەیەوێت بیفرۆشێت، بەڵام تاوەکو ئێستا هیچ دەستەوارەیەکی فەرمی بۆ نەهاتووە، یاریزانەکە ئارەزووی مانەوە دەکات، بەڵام رەنگە ئەگەر یانەیەکی گەورە داوای بکات بیروڕای بگۆڕێت.

ئەگەر دەستەوارەیەکی گونجاو بگات، ریال مەدرید رێگری لە رۆیشتنی کاماڤینگا ناکات، سەرەڕای ئەوەی مۆرینیۆ سەرسام بوو بە ئاستی یاریزانەکە لە کاتی ئامادەکارییەکانی پێش وەرز.

سەبارەت بە ئێندریک، یانەکە بیرۆکەی پێدانی بە خواستنی رەتکردەوە لەسەر داوای مۆرینیۆ، ئێستا سەرنجەکان لەسەر فێرلان مێندییە، بەتایبەت لەبەر ئەوەی ریال مەدرید سێ بژاردەی لە باڵی چەپی بەرگریدا هەیە.

ریال مەدرید دەیەوێت کێشەی مێندی چارەسەر بکات، بەڵام یاریزانەکە هیچ نییەتێکی بۆ رۆیشتن نییە، هەروەها یانەکە چاوەڕێی دەستەوارەیە بۆ راول ئاسێنسیۆ، کە ئەویش متمانەی بە خۆی هەیە مۆرینیۆ قایل بکات، بەڵام تووشی پێکان بووە لە رانی و بۆ ماوەی شەش هەفتە لە مەشقەکان دادەبڕێت، ئەمەش وا دەکات هاتنی دەستەوارە بۆی قورستر بێت.

پلانەکەی مۆرینیۆ بریتییە لە هەبوونی دوو یاریزان بۆ هەر شوێنێک، بەڵام هێشتا قەرەباڵخی لە هەندێک پێگەدا ماوە، بەتایبەت لە چەقی بەرگری تاوەکو میلیتاو دەگەڕێتەوە، هەروەها لە باڵی چەپ کە مێندی وەک یاریزانێکی سەرەکی ئەژمار ناکرێت.

ریال مەدرید هەوڵدەدات پێش داخستنی بازاڕی گواستنەوەکان، چارەنووسی ئەو یاریزانە زیادانە یەکلایی بکاتەوە بۆ ئەوەی لیستەکەی راهێنەرە پۆرتوگالییەکە رێکبخرێتەوە.