وەزارەتی ناوخۆ لێکۆڵینەوە لە شەڕەکەی یاریگەی نەورۆز دەکات
6 کاتژمێر پێش ئێستا
78 جار خوێنراوەتەوە
ئێوارەی ئەمڕۆ لەنێوان هاندەرانی یانەی زاخۆ و نەورۆز لە سلێمانی شەڕ و گرژی دروست بوو، وەزارەتی ناوخۆی هەرێمی کوردستان دەڵێت، بە فەرمانی وەزیری ناوخۆ "ئەنجوومەنێکی لێکۆڵینەوە" دروستکرا و سبەی بۆ لێکۆڵینەوە سەردانی شوێنی رووداوەکە دەکەن.
وەزارەتی ناوخۆی هەرێمی کوردستان لە راگەیێندراوێکدا رایگەیاند: "لە یارییەکی گەڕی 29ی خولی ئەستێرەکانی عێراق کە لە یاریگەی نەورۆز لە شاری سلێمانی لە نێوان یانەی وەرزشی زاخۆ و یانەی وەرزشی نەورۆز بەڕێوەچوو، بەداخەوە گرژی دروست بوو لە نیوان هاندەرانی هەردوو یانەکە و بووە هۆی وەستاندنی یارییەکە و بە سووکی برینداربوونی ژمارەیەک هاندەر."
بە گوێرەی راگەیێندراوەکەی وەزارەتی ناوخۆ، بارودۆخە نەخوازراوەکە کۆنترۆڵکراوە و هێزەکانی پۆلیسی پارێزگای سلێمانی لەنێو یاریگاکەدان "بۆ ئاساییکردنەوەی دۆخەکە و پاراستنی گیانی یاریزان و هاندەران."
هەر لە راگەیێندراوەکەدا هاتووە کە بە فەرمانی رێبەر ئەحمەد، وەزیری ناوخۆی هەرێمی کوردستان، لیژنەیەکی لێکۆڵینەوە پێکهێنراوە و بڕیارە سبەی (چوارشەممە) سەردانی شوێنی رووداوەکە بکات "بۆ لێکۆڵینەوەکردن و دەرخستنی راستییەکان."
وەزارەتی ناوخۆ داوا لە هاندەرانی هەردوو یانە و هاووڵاتییان دەکات "بە رووحی وەرزشی مامەڵە بکەن" و داواش لە کەناڵەکانی راگەیاندن دەکات هاوکار بن لە بڵاوکردنەوەی "رۆحی وەرزشی و برایەتی کە بەشێکن لە بنەماکانی کێبڕکێی نێوان هەموو یانەکانی کوردستان و عێراق و وەرزش بە شێوەیەکی گشتی."
|